Rusia ka ndërmarrë një valë masive sulmesh ajrore ndaj Ukrainës gjatë natës së të enjtes, duke përdorur mbi 70 raketa dhe rreth 280 dronë. Si pasojë e sulmeve, të paktën nëntë persona kanë humbur jetën. Presidenti ukrainas, Volodymyr Zelensky, deklaroi se objektivat kryesore të sulmit ishin kryeqyteti Kiev dhe rajoni perëndimor i Lvivit, pranë kufirit me Poloninë.
Ai kritikoi vonesat e aleatëve në dërgimin e raketave për mbrojtjen ajrore, duke theksuar se mungesa e furnizimeve po kushton jetë njerëzish. “Mbrojtja nga kërcënimi rus i raketave është detyra më e rëndësishme për ruajtjen e jetës së popullit tonë. Aleatët tanë e dinë se si mund të ndihmojnë.
Vonesat në furnizimin me raketa antibalistike sjellin shkatërrimin dhe viktimat që po shohim sot”, tha Zelensky. Forcat ajrore të Ukrainës njoftuan se mbrojtja ajrore arriti të rrëzonte 55 raketa dhe 265 dronë. Megjithatë, vetëm një nga nëntë raketat balistike u ndalua, ndërsa 11 raketa dhe 17 dronë goditën objektiva në 20 lokacione.
Polonia ngriti avionët luftarakë për të siguruar hapësirën e saj ajrore. Kryeministri polak, Donald Tusk, tha se një raketë ruse lundrimi dyshohet se ra në një fushë në lindje të vendit, duke lënë një krater të madh dhe mbetje. Një nga sulmet më të rënda ndodhi në rajonin e Dnipropetrovskit, ku gjashtë persona, përfshirë tre fëmijë, u vranë nga një raketë.
Për të premten është shpallur ditë zie në fshatin e goditur. Sipas Zelenskyt, pesë fëmijë të tjerë rezultojnë të zhdukur, pasi shtëpia ku ndodheshin u shkatërrua pothuajse tërësisht nga shpërthimi. Sinjali – aty ku e vërteta flet para lajmit!