FIFA ka reaguar pas akuzave të ngritura rreth gjykimit në ndeshjen mes Argjentinës dhe Egjiptit në Kupën e Botës, ku përfaqësuesja egjiptiane pretendoi se ishte dëmtuar nga vendimet e arbitrave.
Kreu i departamentit të gjyqtarëve në FIFA, Pierluigi Collina, ka deklaruar se diskutimet për vendimet e arbitrave janë pjesë e futbollit, por ka kundërshtuar pretendimet për manipulim të ndeshjeve. “Diskutimi konstruktiv rreth vendimeve do të jetë gjithmonë pjesë e futbollit, por akuzat pa bazë nuk kanë vend në sportin tonë.
Integriteti i gjyqtarëve të Kupës së Botës nuk mund të vihet në dyshim”, ka thënë Collina. Ai ka theksuar se as presidenti i FIFA-s, Gianni Infantino, nuk ka ndikim në vendimet e arbitrave, duke shtuar se ekipi i gjyqtarëve punon me pavarësi të plotë. “Askush nuk mund të pretendojë se arbitrimi i FIFA-s mund të ndikohet nga kushdo, madje as nga presidenti i FIFA-s.
Gjyqtarët marrin vendime të drejta dhe përpiqen gjithmonë të japin më të mirën e tyre”, u shpreh ish-gjyqtari italian. Collina gjithashtu ka analizuar dy situatat më të kontestuara nga kampi egjiptian në humbjen 3-2 ndaj Argjentinës. Sipas tij, ndërhyrja e VAR-it në rastin e një faulli në aksionin që çoi te një gol ishte e rregullt, pasi çdo faull gjatë fazës sulmuese mund të shqyrtohet.
Ai sqaroi edhe rastin e golit të tretë të Argjentinës, duke thënë se kontakti mes lojtarëve ishte vlerësuar si një përplasje normale futbolli dhe jo si faull. Egjipti kishte paraqitur ankesë zyrtare në FIFA, duke kërkuar masa pas eliminimit nga turneu, ndërsa disa lojtarë të kombëtares afrikane kishin ngritur dyshime për drejtësinë e vendimeve.
FIFA, përmes deklaratës së Collinës, ka insistuar se sistemi i gjykimit dhe përdorimi i VAR-it funksionojnë mbi bazën e rregullave dhe jo ndikimeve të jashtme. Sinjali – aty ku e vërteta flet para lajmit!