Franca, Holanda dhe Belgjika kanë regjistruar 3 mijë e 700 vdekje shtesë gjatë valës së të nxehtit të qershorit që rriti temperaturat në të gjithë Evropën, me autoritetet që paralajmërojnë se shifrat janë paraprake dhe mund të rriten.
Ekspertët kanë thënë se vala e të nxehtit, e cila zgjati nga rreth 20 deri më 28 qershor, ishte më e keqja e regjistruar në Evropë , duke shkaktuar ndërprerje në prodhimin e energjisë, duke dëmtuar infrastrukturën dhe duke mbingarkuar sistemet e kujdesit shëndetësor. Shkencëtarët thanë se nxehtësia ekstreme pothuajse me siguri u shkaktua nga ndryshimet klimatike.
Në Francë u regjistruan 2 mijë e 25 vdekje të tepërta gjatë valës së të nxehtit, me një rritje të veçantë të vdekjeve në mesin e njerëzve mbi 45 vjeç, tha të premten ministrja franceze e shëndetësisë, Stephanie Rist, për televizionin lokal, shkruan Reuters.
Vdekjet në shtëpi u rritën me 91% midis 22-28 qershorit krahasuar me javën e kaluar, ndërsa vdekjet në azilet e pleqve dhe institucionet e kujdesit shëndetësor gjithashtu u rritën, tha autoriteti i shëndetit publik i vendit në një buletin. “Vdekshmëria do të jetë … më e lartë nga sa sugjerojnë këto shifra fillestare”, paralajmëroi autoriteti.
Në Belgjikë, Ministria e Shëndetësisë tha të enjten se kishte regjistruar vdekshmëri të tepërt prej rreth 1 mijë e 200 vdekjesh midis 18 qershorit dhe 29 qershorit, duke shtuar se 530 nga vdekjet ishin midis njerëzve të moshës 85 vjeç e lart. Njerëzit nën moshën 65 vjeç përbënin 180 nga vdekjet e tepërta.
“Një vdekshmëri e tillë e tepërt gjatë një vale të nxehti është e pashembullt në vendin tonë”, tha ministria në një deklaratë. Autoritetet në Holandë thanë se vala e të nxehtit çoi në rreth 480 vdekje të tepërta , kryesisht në mesin e personave mbi të 80-at.