Gazeta Sinjali raportoi ekskluzivisht se Dukagjin Nikollaj, i njohur me nofkën “Duka”, ishte një nga personat e dyshuar për përfshirje në përleshjen e armatosur në lokalin “Bon Vivant” në Prishtinë, ku mbeti i vrarë 39-vjeçari Kastriot Ramadani. Tashmë, Sinjali mëson se Nikollaj është ekstraduar nga Spanja në Kosovë dhe ndodhet në Prishtinë.
Policia e Kosovës ka njoftuar se më ka ekstraduar nga Spanja një shtetas kosovar, i cili kërkohej përmes INTERPOL-it me letërreshtim ndërkombëtar për veprën penale “Vrasje e mbetur në tentativë”.
Sipas Policisë, i dyshuari ishte arrestuar nga autoritetet spanjolle, ndërsa pas ekstradimit u është dorëzuar njësive përkatëse policore në rajonin e Prishtinës për vazhdimin e procedurave ligjore. Rasti në “Bon Vivant” kishte ndodhur më , në rrugën “Xheladin Hana”, pas një mosmarrëveshjeje mes disa personave, ku dyshohet se ishin përdorur armë zjarri.
Si pasojë e të shtënave, Kastriot Ramadani kishte humbur jetën, ndërsa katër persona të tjerë ishin plagosur. Po ashtu, 17 persona, prej tyre tre burra dhe 14 gra, kishin marrë lëndime nga thyerja e gotave dhe shisheve të qelqit. Sinjali kishte mësuar se Nikollaj dyshohej se ishte përfshirë në shkrepjen e armëve dhe më pas ishte larguar nga vendi i ngjarjes.
Në mesin e të dyshuarve për rastin ishin përmendur edhe Andi Pajaziti, i njohur me nofkën “Italiani”, Hysni Geci dhe Gzim Zakuti. Ekstradimi është realizuar në koordinim mes Policisë së Kosovës, institucioneve të drejtësisë dhe autoriteteve spanjolle.
Ekstradohet nga Spanja Dukagjin Nikollaj, i dyshuari për rastin “Bon Vivant” Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata. Sinjali – aty ku e vërteta flet para lajmit!