Azilkërkuesit shqiptarë po u paguajnë policëve të korruptuar për të siguruar letra zyrtare që mbështesin aplikimet e tyre për azil, zbulon Daily Mail. Emigrantët nga Shqipëria shpesh pretendojnë se janë kërcënuar nga kriminelë në vendin e tyre si bazë për të kërkuar azil në Mbretërinë e Bashkuar.
Meqenëse këto aplikime kanë gjasa të dështojnë pa prova mbështetëse, krimi i organizuar ka ndërhyrë duke ofruar një zgjidhje përmes zyrtarëve të korruptuar, që ndodhen në listat e pagesave të grupeve kriminale.
Një grup, që vepronte përmes një llogarie në TikTok të quajtur “punë të ndryshme Europe”, reklamonte drejtpërdrejt shërbimet e tij për emigrantët shqiptarë që dëshironin të paraqisnin kërkesa të rreme për azil.
“Për djemtë që po kërkojnë azil në Europë dhe Mbretërinë e Bashkuar dhe kanë nevojë për deklarata që tregojnë se kanë probleme në Shqipëri, na kontaktoni me mesazh privat”, thuhej në një nga postimet. Në vijim shtohet “ne mund të sigurojmë deklarata të vërteta nga shteti ose spitalet që tregojnë se jeni kërcënuar në Shqipëri. Për më shumë informacion, na shkruani”.
Duke përdorur një numër telefoni shqiptar, një gazetar i infiltruar i Daily Mail u paraqit sikur kishte një të afërm në një qendër ndalimi në Mbretërinë e Bashkuar, i cili kishte nevojë për një deklaratë policore për të mbështetur kërkesën e tij për azil. Përgjigjja mbërriti brenda pak minutash, duke ofruar një letër për 3,000 euro (rreth 2,616 paund).
Grupi premtoi se dokumenti do të deklaronte se kushëriri fiktiv ishte kërcënuar në Shqipëri dhe se do të përmbante firmën, vulën dhe emrin e plotë të shefit të policisë që e kishte lëshuar. Kur gazetari kërkoi prova për një letër të përgatitur më parë, ata i dërguan një dokument që mbante emrin e një drejtuesi policie në qytetin lindor të Korçës.
Më shumë se 17,000 shqiptarë kërkuan azil në Mbretërinë e Bashkuar në vitin 2022, përpara se një marrëveshje për përshpejtimin e kthimeve të ulte këtë shifër në 2,648 deri në vitin 2024.
Ministria e Brendshme britanike tani e konsideron Shqipërinë një vend të sigurt dhe refuzoi 97 për qind të të gjitha kërkesave për azil gjatë vitit 2024, megjithëse një pjesë e tyre mund të jenë pranuar pas apelimeve. Gazetari i infiltruar kontaktoi faqen “Punë të ndryshme Europe” më herët gjatë këtij viti, duke shkruar: “Kam një të afërm në një qendër ndalimi në Londër.
Si mund të sigurojmë një deklaratë që ta ndihmojë të lirohet dhe të kërkojë azil?” Një anëtar i grupit iu përgjigj: “Po, mund të bëjmë një deklaratë që thotë se ai ka probleme në Shqipëri.
Do të kushtojë 3,000 euro.” Kur gazetari pyeti se nga kush do të lëshohej deklarata, përdoruesi anonim tha se ajo do të lëshohej nga “policia” dhe do të përfshinte “firmën, vulën dhe emrin e plotë të shefit të policisë që e lëshon”. Anëtari i grupit kërkoi gjysmën e shumës paraprakisht dhe pjesën tjetër pasi dokumenti të ishte marrë.
Kur iu kërkua një shembull i një deklarate të mëparshme, ata dërguan një dokument model që pretendonte se ishte lëshuar nga “Drejtoria e Përgjithshme e Policisë së Shtetit Shqiptar” në Komisariatin e Policisë Korçë.
Letra thoshte: “Konfirmojmë se çifti bashkëshortor u paraqit në Komisariatin e Policisë Korçë më në orën , duke raportuar një incident të ndodhur në Lagjen Nr. 8, Rruga Spase Pema. Me vullnetin e tyre të lirë, ata raportuan se tre persona të armatosur i sulmuan duke përdorur armë zjarri, duke u shkaktuar lëndime në trup dhe në kokë.
Ne kemi identifikuar një nga personat e përfshirë në aktin e dhunës, të quajtur [emri i fshehur], i cili kërkoi informacion për vendndodhjen e djalit të tyre [emri i fshehur]. Sulmuesit më pas u larguan nga vendi i ngjarjes. Meqenëse kjo vepër penale ka ndodhur në juridiksionin e Komisariatit të Policisë Korçë, janë nisur hetimet e nevojshme në përputhje me ligjin.
Kjo deklaratë lëshohet me kërkesë të palëve të interesuara.” Një ekspert i krimit të organizuar shqiptar, i cili kërkoi të mos identifikohej, tha se këto letra të rreme janë dëshmia më e fundit e përpjekjeve të grupeve kriminale për të mashtruar zyrtarët e Ministrisë së Brendshme britanike.
“Nuk jam aspak i habitur që këto deklarata po u shiten personave që kërkojnë azil në Mbretërinë e Bashkuar”, tha eksperti për Mail, duke shtuar “është thellësisht shqetësuese mënyra se si këto grupe kriminale kanë rekrutuar zyrtarë brenda Policisë së Shtetit Shqiptar për të lëshuar dokumente të tilla”.
Eksperti shtoi se në të kaluarën azilkërkues të rremë kanë paguar gazeta shqiptare për të publikuar histori të sajuara mbi përndjekje ose kërcënime ndaj jetës së tyre. “Këto artikuj më pas i janë dorëzuar Ministrisë së Brendshme britanike si pjesë e aplikimeve për azil” , shtoi ai. Llogaria në TikTok është mbyllur që atëherë.
Megjithëse tani është më e vështirë për shqiptarët të sigurojnë azil sesa në të kaluarën, shumë prej tyre vazhdojnë të provojnë. Një metodë e zakonshme është pretendimi se janë të përfshirë në një “gjakmarrje”, sipas së cilës një burrë ndihet i detyruar të vrasë një anëtar të një familjeje tjetër për të hakmarrë një fyerje ose konflikt të mëparshëm.
Të tjerë pretendojnë se janë viktima të trafikimit, dhunës në familje ose diskriminimit për shkak të orientimit seksual. Vitin e kaluar, Mail zbuloi një skemë ku një përkthyese e pavarur kërkonte pagesa prej 3,000 paundësh për të ndihmuar emigrantët e paligjshëm të dilnin nga qendrat e ndalimit.
Ajo u ofronte garantues të rremë që mashtronin gjykatësit për të dhënë lirimin me kusht të emigrantëve të paligjshëm. Kur një gazetar i infiltruar, që paraqitej si i afërm i një emigranti të ndaluar, e kontaktoi, ajo tha se kundrejt 3,000 paundëve plus 1,000 paund për garantuesin, mund të siguronte një tjetër përkthyes që punonte gjithashtu për Ministrinë e Brendshme britanike dhe që do të paraqitej si garantues në seancën për lirimin me kusht.
Ajo pretendoi se puna e saj si përkthyese për Home Office i kishte dhënë njohuri të plota mbi sistemin e emigracionit. TikTok deklaroi se nuk lejon përmbajtje që paraqet ose promovon trafikimin dhe kontrabandimin e qenieve njerëzore, përfshirë lehtësimin ose koordinimin e akteve dhe shërbimeve të kontrabandimit të emigrantëve.
Ministria e Brendshme e Shqipërisë deklaroi se letra e publikuar nuk dukej se përputhej me “standardet për hartimin e dokumenteve zyrtare”. Sipas saj, kjo do të thotë se dokumenti nuk mund të jetë “krijuar nga institucioni i Policisë së Shtetit”.
Një zëdhënës i Ministrisë së Brendshme britanike tha se “Sekretarja e Brendshme ka paraqitur reformat më të gjera për migracionin e paligjshëm në kohët moderne, duke eliminuar stimujt që i tërheqin njerëzit të vijnë këtu përmes rrugëve të paligjshme dhe duke intensifikuar kthimin e individëve që nuk kanë të drejtë të qëndrojnë në Mbretërinë e Bashkuar.”