Presidenti ukrainas, Volodymyr Zelensky, i ka kërkuar Shteteve të Bashkuara të Amerikës që të marrin një vendim për dhënien e një licence Ukrainës për prodhimin e sistemeve mbrojtëse Patriot, të prodhuara në SHBA, pas sulmeve të fundit të Rusisë gjatë natës.
Zelensky, i cili prej muajsh ka kërkuar një miratim të tillë nga SHBA-të pa sukses, tha se mbrojtja ajrore e Ukrainës është “një çështje absolutisht me përparësi të lartë dhe kritike”. “Është veçanërisht e rëndësishme që marrëveshjet tona me SHBA-në mbi prodhimin e raketave antibalistike të ecin drejt zbatimit”, deklaroi ai.
“Ne gjithashtu mbështetemi shumë në vendimin e Shteteve të Bashkuara në lidhje me licencat për Patriot dhe punë të tjera të përbashkëta: kjo është ajo që mund të ndalojë luftën dhe sulme të ngjashme”, shtoi Zelensky.
Ukraina është pajisur me sistemet Patriot, i vetmi sistem raketor tokë-ajër në arsenalin e saj i aftë për t’iu kundërvënë raketave balistike të Rusisë gjatë luftës, por synon të jetë në gjendje t’i prodhojë ato vetë. Ndërkohë, presidenti amerikan Donald Trump ka deklaruar muajin e kaluar se do të “shqyrtojë” mundësinë që Ukraina të prodhojë raketat e saj Patriot.
Sinjali – aty ku e vërteta flet para lajmit!