Europa vazhdon të dominojë skenën e futbollit botëror edhe në këtë edicion të Kupës së Botës. Nga 208 lojtarët që përfaqësojnë tetë kombëtaret çerekfinaliste, plot 196 aktivizohen në ligat evropiane, duke konfirmuar edhe një herë epërsinë e futbollit të kontinentit të vjetër. Pas Evropës renditet Azia me pesë lojtarë, ndërsa Amerika e Jugut ka tre përfaqësues.
Afrika dhe Amerika e Veriut kompletojnë listën me nga dy lojtarë secila. Ndër kampionatet evropiane, Premier League është lider absolut me 65 lojtarë, duke qenë kampionati që furnizon më shumë futbollistë në fazën çerekfinale. Një statistikë interesante lidhet me Anglinë, pasi 21 nga 26 lojtarët e kombëtares angleze luajnë në kampionatin vendas.
Në vendin e dytë renditet La Liga, me 39 lojtarë, falë kontributit të madh të klubeve si Real Madrid, Barcelona dhe Atlético Madrid, të cilat vazhdojnë të jenë burime kryesore të talenteve në arenën ndërkombëtare. Ligue 1 franceze ka 26 lojtarë në këtë fazë të turneut.
Paris Saint-Germain mbetet klubi kryesor që kontribuon me futbollistë, ndërsa edhe Strasbourg ka dhënë një kontribut të rëndësishëm. Megjithatë, vetëm tetë prej tyre janë pjesë e kombëtares së Francës të drejtuar nga Didier Deschamps. Serie A italiane dhe Bundesliga gjermane ndajnë vendin e katërt, me nga 21 lojtarë secila.
Nga ana tjetër, Bundesliga numëron gjithashtu 21 lojtarë, ku një rol të rëndësishëm ka kombëtarja e Zvicrës me nëntë futbollistë që aktivizohen në elitën gjermane. Mes emrave më të spikatur janë Dayot Upamecano, Michael Olise dhe Harry Kane.
Ligat e tjera në Evropë dhe në botë kontribuojnë me 36 lojtarë, ku spikat Lionel Messi, i cili aktivizohet te Inter Miami së bashku me bashkëkombësin e tij Rodrigo De Paul. Shifrat tregojnë qartë se pesë kampionatet kryesore evropiane vazhdojnë të mbeten epiqendra e futbollit botëror, duke furnizuar pjesën dërrmuese të lojtarëve që synojnë trofeun më prestigjioz në arenën ndërkombëtare.