Pentagoni po shqyrton zhvendosjen e disa prej bazave të tij ushtarake nga Arabia Saudite dhe Kuvajti, me qëllim uljen e rrezikut nga sulmet e mundshme të Iranit në rast të rifillimit të operacioneve ushtarake në Lindjen e Mesme, raportoi The Wall Street Journal.
Sipas gazetës, pas operacionit ushtarak të SHBA-së kundër Iranit më 28 shkurt, rreth 20 baza amerikane në rajon janë dëmtuar nga sulmet hakmarrëse. Kjo situatë ka rritur shqetësimet në Uashington se bazat amerikane ndodhen brenda rrezes së raketave iraniane, duke nxitur rishikimin e pranisë ushtarake në rajon.
Në këtë kuadër, Izraeli po konsiderohet si një nga vendet e mundshme pritëse për disa nga këto baza që mund të zhvendosen nga Arabia Saudite dhe Kuvajti. Komanda ushtarake amerikane po punon gjithashtu për zhvillimin e opsioneve të reja për vendosjen më të shpërndarë të objekteve ushtarake në gjithë Lindjen e Mesme, me qëllim zvogëlimin e ekspozimit të tyre në rast konfliktesh të ardhshme.
Më 17 qershor, SHBA dhe Irani nënshkruan një memorandum mirëkuptimi që parashikon një armëpushim të menjëhershëm në të gjitha frontet, përfshirë Libanin. Fillimisht ishte planifikuar një ceremoni nënshkrimi në Burgenstock të Zvicrës më 19 qershor, por dokumenti u nënshkrua në distancë.
Ndërkohë, më 21 qershor, në Burgenstock u mbajtën bisedime SHBA–Iran për ratifikimin e memorandumit, të ndërmjetësuara nga Katari dhe Pakistani. Pas raundit të parë, palët deklaruan se takimi u zhvillua në një atmosferë pozitive dhe konstruktive, me përparim në hedhjen e bazave për bisedime të mëtejshme teknike. Sinjali – aty ku e vërteta flet para lajmit!