Një situatë e pazakontë dhe e diskutueshme ka shpërthyer në Kampionatin Botëror 2026, vetëm pak orë para ndeshjes së fazës me eliminim direkt mes Shteteve të Bashkuara dhe Belgjikës, duke vënë në qendër të vëmendjes vendimin e FIFA-s për sulmuesin amerikan Folarin Balogun.
Sipas vendimit të institucionit më të lartë të futbollit, Balogun do të jetë i gatshëm për këtë sfidë, pavarësisht se ishte ndëshkuar me karton të kuq në ndeshjen e kaluar. Ky zhvillim ka shkaktuar reagim të menjëhershëm dhe të ashpër nga Federata Mbretërore e Futbollit të Belgjikës (RBFA), e cila e ka cilësuar vendimin si të papritur dhe në kundërshtim me rregullat e garës.
Në një deklaratë zyrtare, federata belge është shprehur e habitur me këtë vendim, duke theksuar se një situatë e tillë cenon parimet e garës së ndershme dhe uniformitetin e rregulloreve që aplikohen për të gjitha kombëtaret. Sipas RBFA-së, FIFA është bazuar në Nenin 27 të Kodit Disiplinor, i cili lejon pezullimin e përkohshëm të ekzekutimit të një dënimi.
Megjithatë, pala belge thekson se rregullore të tjera të kompeticionit parashikojnë qartë se një karton i kuq sjell automatikisht pezullim për ndeshjen pasuese. Në deklaratë përmenden edhe dispozita të tjera të rregullores, të cilat sipas Belgjikës mbështesin praktikën e pezullimit automatik dhe e bëjnë të diskutueshëm vendimin e FIFA-s për rastin Balogun.
Federata belge ka paralajmëruar gjithashtu se po shqyrton të gjitha opsionet e mundshme për të mbrojtur interesat e saj dhe për të garantuar respektimin e parimeve të Fair Play-t në kompeticion.
Ky zhvillim ka shtuar tensionin para një prej ndeshjeve më të rëndësishme të fazës eliminatore, ndërsa vëmendja e botës së futbollit është përqendruar në Seattle, ku SHBA dhe Belgjika pritet të përballen në një sfidë me shumë polemika jashtë fushës së lojës. Sinjali – aty ku e vërteta flet para lajmit!