Presidenti i Këshillit Evropian, Antonio Costa, ka deklaruar se Bashkimi Evropian duhet t’i rrisë investimet në mbrojtje, siguri dhe qëndrueshmëri strategjike, përballë sfidave globale në rritje. Pas takimit me kryeministrin e Çekisë, Andrej Babis, në Pragë, Costa tha se negociatat për buxhetin evropian për periudhën 2028–2034 kanë hyrë në një fazë vendimtare.
“Po arrijmë në një moment vendimtar në negociatat për buxhetin tonë të ardhshëm evropian. Mjedisi gjeopolitik ka ndryshuar që kur miratuam buxhetin aktual në vitin 2020”, deklaroi ai. Costa theksoi se BE-ja, më shumë se kurrë, duhet të investojë në mbrojtje dhe siguri, konkurrueshmëri, inovacion dhe qëndrueshmëri strategjike.
Sipas tij, buxheti i ardhshëm duhet të modernizohet për t’iu përshtatur prioriteteve të reja të bllokut, duke ruajtur njëkohësisht mbështetjen për shtetet anëtare, politikën e kohezionit dhe sektorin e bujqësisë.
“Është thelbësore që të arrijmë një marrëveshje deri në fund të këtij viti”, tha Costa, duke paralajmëruar se nuk duhet të ketë ndërprerje të financimit të projekteve dhe politikave të rëndësishme evropiane në vitin 2028.
Ai kërkoi gjithashtu përshpejtimin e përpjekjeve për uljen e kostove të energjisë, paralelisht me tranzicionin e gjelbër dhe dekarbonizimin, duke përfshirë energjinë bërthamore dhe burimet e rinovueshme. Costa tha se mbështetja për Ukrainën, Moldavinë dhe Ballkanin Perëndimor në rrugën drejt anëtarësimit në BE përbën gjithashtu “investim në sigurinë dhe prosperitetin e Evropës”.
Sinjali – aty ku e vërteta flet para lajmit!