Aroma e çokollatës së zezë mund të ndikojë përkohësisht në ndjenjën e urisë dhe performancën gjatë ushtrimeve fizike, sipas një studimi të ri të publikuar në revistën shkencore Frontiers in Physiology. Studimi përfshiu 23 burra të rinj, të shëndetshëm dhe të stërvitur, të cilët ishin ekspozuar ndaj aromës së çokollatës së zezë, çokollatës me qumësht ose një substance kontrolli.
Testet u zhvilluan pas një agjërimi gjatë natës, transmeton Klankosova.tv. Rezultatet treguan se aroma e çokollatës së zezë uli ndjenjën e urisë dhe dëshirën për të ngrënë, ndërsa pjesëmarrësit realizuan më shumë përsëritje gjatë ushtrimeve me pesha. Në total, ata kryen rreth 18 përsëritje më shumë krahasuar me testin ku nuk iu prezantua aroma e çokollatës.
Në rastin e çokollatës me qumësht, efekti kryesor ishte rritja e kënaqësisë ndaj aromës, ndërsa efekti në oreks ishte ndryshe nga ai i çokollatës së zezë. Studiuesit sugjerojnë se aroma mund të ndikojë në mënyrën se si truri përpunon sinjalet e urisë dhe ngopjes, duke ndikuar edhe në performancën fizike.