Presidenti i FIFA-s, Gianni Infantino, duket se po kërkon mbështetje në vende të ndryshme për të forcuar pozitat e tij, në një moment kur po përballet me presione në rritje për të dhënë dorëheqjen.
Sipas asaj që raporton “The Times”, Infantino u ka bërë të ditur drejtuesve të futbollit në Amerikën e Jugut se është i gatshëm të mbështesë propozimin e CONMEBOL-it për zgjerimin e Botërorit 2030 në 64 skuadra. Ky qëndrim vjen në një periudhë të vështirë për numrin një të FIFA-s.
Infantino është përballur me kërkesa për largim nga drejtues të UEFA-s, CONCACAF-it dhe konfederatës aziatike (AFC), pas polemikave rreth projektit “FIFA Forward Enterprise”, i cili parashikonte përfshirjen e investitorëve privatë në menaxhimin e të drejtave të Botërorit.
Ndërkohë, CONMEBOL-i ka propozuar që numri i pjesëmarrësve në Kupën e Botës 2030 të rritet nga 48, sa ishte në Botërorin e fundit, në 64 ekipe. Ideja lidhet edhe me dëshirën e Amerikës së Jugut për të pasur një rol më të madh në festimet e 100-vjetorit të Kupës së Botës.
Botërori 2030 do të organizohet kryesisht nga Spanja, Portugalia dhe Maroku, ndërsa disa ndeshje do të luhen në Argjentinë, Paraguaj dhe Uruguaj, në kuadër të përvjetorit të parë të turneut, të zhvilluar në Uruguaj në vitin 1930.
Në këtë situatë, mbështetja për një Botëror me 64 skuadra mund të jetë një lëvizje strategjike e Infantinos për të fituar aleatë të rinj dhe për të konsoliduar pozitat e tij në krye të FIFA-s.