Pas afrimit të Ronald Araujos nga Barcelona për ta përforcuar mbrojtjen, Liverpooli po punon për ta fuqizuar repartin ofanziv, i cili ka mbetur pa Mohamed Salah, i transferuar në Turqi për ta veshur fanellën e Trabzonsporit. Për këtë arsye, klubi anglez i ka nisur kontaktet e para me Paris Saint-Germain për dy futbollistë.
Objektivi kryesor i “Reds” është anësori ofanziv Bradley Barcola, i lindur në vitin 2002, të cilin PSG-ja e vlerëson 145 milionë funte. Bëhet fjalë për një shifër shumë të lartë, e cila përplaset me politikën e Liverpoolit për të mos shpenzuar shuma të tepruara për lojtarët që synon, në mënyrë që të mos e cenojë modelin e tij të qëndrueshmërisë financiare.
Për këtë arsye, sipas asaj që raporton “Sky Sports”, Liverpooli po e shqyrton mundësinë për t’u orientuar drejt Ibrahim Mbaye, futbollistit tjetër të PSG-së, i lindur në vitin 2008, përcjell “Gazeta Express”. 18-vjeçari shihet si një lojtar me cilësi dhe perspektivë, i cili mund të luajë në të dyja krahët e repartit ofanziv.
Megjithatë, nuk përjashtohet mundësia që Liverpooli t’i vazhdojë të dyja negociatat në mënyrë të pavarur, si për Barcolan, ashtu edhe për Mbaye. Në këtë mënyrë, klubi anglez po e eksploron tregun e PSG-së në kërkim të përforcimeve për sulmin, me Barcolan si objektivin kryesor dhe Mbaye si një alternativë më e re dhe potencialisht më e arritshme.