Presidenti amerikan, Donald Trump, ka mohuar raportimet se Shtetet e Bashkuara po përballen me mungesë municionesh, mes shqetësimeve në rritje për gjendjen e arsenalit ushtarak gjatë luftës me Iranin. Përmes një postimi në rrjetet sociale, Trump deklaroi se SHBA-ja posedon sasi të mëdha municionesh dhe se prodhimi po vazhdon sipas nevojave të ushtrisë.
“SHBA-ja ka sasi të mëdha municionesh, veçanërisht të disa llojeve. Përveç kësaj, sasi të mëdha po prodhohen dhe po dërgohen sipas nevojës”, ka shkruar ai. Trump paralajmëroi gjithashtu se administrata e tij do të kërkojë dënime të gjata me burg për personat përgjegjës për rrjedhjen e informacioneve të ndjeshme rreth rezervave ushtarake.
Deklarata e tij vjen pasi disa media amerikane raportuan se SHBA-ja ka përdorur një pjesë të konsiderueshme të rezervave të raketave me precizion të lartë gjatë luftës me Iranin. Sipas raportimeve të pakonfirmuara, Trump ishte përballur edhe me Sekretarin e Mbrojtjes, Pete Hegseth, lidhur me një mungesë të mundshme armësh.
Shtëpia e Bardhë dhe Pentagoni i kanë mohuar pretendimet për mungesë municionesh dhe përplasje mes tyre. SHBA-ja dhe Irani kanë vazhduar shkëmbimin e sulmeve, pavarësisht disa pauzave në luftime, ndërsa ende nuk është arritur një marrëveshje për përfundimin e konfliktit. Sinjali – aty ku e vërteta flet para lajmit!