Presidenti i Trabzonsporit, Ertugrul Dogan, ka folur për spekulimet që e lidhin klubin turk me transferimin e yllit egjiptian, Mohamed Salah. 34-vjeçari është aktualisht lojtar i lirë pas largimit nga Liverpooli këtë verë dhe është përfolur për një kalim te një nga klubet e mëdha të Turqisë.
Pavarësisht interesimit të raportuar nga Besiktasi, Trabzonspori është përmendur si një kandidat që mund të befasojë në garën për shërbimet e Salahut, i cili gjithashtu është lidhur me një transferim në Arabinë Saudite apo në Major League Soccer.
Megjithatë, presidenti i Trabzonsporit ka mohuar se ekziston ndonjë marrëveshje me sulmuesin egjiptian, duke pranuar se çdo klub do të dëshironte një lojtar të nivelit të tij. “Nuk ka marrëveshje me Mohamed Salah. Nuk ka asnjë plan që ai të udhëtojë drejt Trabzonit. Nëse do të kishte diçka të tillë, do ta kishim bërë të ditur për mediat dhe tifozët” , ka deklaruar Dogan.
Ai shtoi se Salah është një futbollist që do ta dëshironte çdo skuadër në botë, por aktualisht nuk ka asnjë zhvillim konkret. “Kush nuk do të dëshironte të nënshkruante me një lojtar të kalibrit të Mohamed Salah? Sigurisht që do ta dëshironim, por e vërteta është se në këtë moment nuk ka marrëveshje”, u shpreh presidenti turk.
Salah mbylli një periudhë gati dhjetëvjeçare te Liverpooli, ku zhvilloi mbi 440 paraqitje, shënoi 257 gola dhe fitoi tetë trofe. Një kalim në Turqi do të ishte një kapitull i ri në karrierën e tij të suksesshme.