Një shpërthim i parazitit Cyclospora cayetanensis po vazhdon të përhapet në Shtetet e Bashkuara, pavarësisht deklaratave të mëhershme se situata ishte vënë nën kontroll. Sipas Qendrave Amerikane për Kontrollin dhe Parandalimin e Sëmundjeve, vetëm gjatë periudhës 21–28 korrik janë raportuar rreth 2,500 raste të reja.
Që nga 1 maji janë konfirmuar mbi 6,700 raste, ndërsa më shumë se 11,500 raste të tjera janë ende në pritje të analizave laboratorike ose verifikimeve shtesë. Deri më tani nuk është raportuar asnjë viktimë, por 423 persona janë shtruar në spital. Infeksioni shkakton probleme serioze të tretjes, përfshirë diarre të shpeshtë dhe të papritur.
Ekspertët shëndetësorë vazhdojnë të hetojnë burimin e përhapjes së parazitit. Kompania Taylor Farms ishte vënë fillimisht nën dyshim, pasi autoritetet amerikane kishin raportuar gjurmë të parazitit në sallatën e grirë të paketuar. Administrata Amerikane e Ushqimit dhe Barnave më pas deklaroi se rezultati kishte qenë pozitiv i rremë.
Megjithatë, kompania pranoi ta tërhiqte vullnetarisht produktin nga tregu. Autoritetet paralajmërojnë se numri real i personave të infektuar mund të jetë më i madh, pasi shumë prej tyre shërohen pa kërkuar trajtim mjekësor dhe nuk testohen.
Sipas të dhënave të publikuara, vatrat kryesore të përhapjes janë regjistruar në Michigan dhe Ohio, ndërsa raste janë raportuar në pothuajse të gjitha shtetet amerikane. Ekspertët rekomandojnë larjen e mirë të frutave dhe perimeve, si dhe gatimin e ushqimit në temperatura të larta, për ta zvogëluar rrezikun e infektimit. Sinjali – aty ku e vërteta flet para lajmit!