Në Gjykatën e Prizrenit të enjten, më , është mbajtur vazhdimi i shqyrtimit gjyqësor ndaj Arlind Sadikut, i akuzuar për veprën penale – vrasje e rëndë në tentativë. Avokati i të akuzuarit, Bajram Hamitaga, njoftoi trupin gjykues se klienti i tij pas konsultimeve me mbrojtjen do të deklarohej lidhur me pranimin e fajësisë.
I pyetur nga kryetarja e trupit gjykues, Sadije Selmani, nëse e pranonte fajësinë, Sadiku ka pranuar fajësinë, duke i kërkuar falje babait të tij dhe duke premtuar gjithashtu se nuk do të përsërisë më veprime të tilla. “E pranoj fajësinë dhe i kërkoj falje babait, nuk kam me e përsëritë ma” – tha Sadiku.
Pas pranimit të fajësisë, trupi gjykues konstatoi se janë përmbushur kushtet ligjore dhe e pranoi pranimin e fajësisë. Në fjalën përfundimtare, prokurori i shtetit, Atnor Skoro, deklaroi se me pranimin e fajësisë nga i akuzuari, është vërtetuar gjendja faktike e përshkruar në aktakuzë dhe i propozoi Gjykatës që ta shpallë fajtor dhe ta dënojë sipas ligjit.
Ai kërkoi gjithashtu që krahas dënimit Gjykata t’i shqiptojë të akuzuarit edhe masën e trajtimit të detyrueshëm psikiatrik në liri, si dhe të konfiskojë një sëpatë, e cila, sipas aktakuzës, është përdorur si mjet i kryerjes së veprës penale.
Prokurori kërkoi po ashtu që, pas plotfuqishmërisë së aktgjykimit të shkatërrohen edhe mostrat e tamponëve me njolla gjaku që janë administruar si prova në këtë procedurë. I dëmtuari, S.S. deklaroi se nuk kërkon kompensim të dëmit dhe se dëshira e tij është që djali i tij të trajtohet dhe të shërohet.
Mbrojtësja e viktimave, Ganimete Kitmir, mbështeti në tërësi fjalën përfundimtare të prokurorit të shtetit. Ndërkaq, mbrojtësi i të akuzuarit, avokati Bajram Hamitaga, kërkoi nga Gjykata që gjatë caktimit të dënimit të vlerësojë si rrethana lehtësuese faktin se i akuzuari nuk ka qenë më parë në konflikt me ligjin, është penduar për veprën, i ka kërkuar falje babait të tij dhe ka premtuar se nuk do të kryejë më vepra penale.
Ai kërkoi gjithashtu shqiptimin e masës së trajtimit të detyrueshëm psikiatrik në liri, në përputhje me propozimin e prokurorit dhe mendimin e ekspertit psikiatrik të dhënë në seancën e 24 korrikut 2026, si dhe ndërprerjen e masës së paraburgimit.
Edhe vetë i akuzuari, në fjalën e tij përfundimtare, i kërkoi falje babait, premtoi se do ta ndjekë rregullisht terapinë dhe kontrollet psikiatrike, si dhe kërkoi që t’i ndërpritet masa e paraburgimit. Gjithashtu, në fillim të seancës, i dëmtuari – babai i të akuzuarit – dha deklaratën e tij në cilësinë e dëshmitarit, duke treguar ngjarjen e 14 janarit 2026.
Ai tha se kishte vërejtur që djali i tij nuk ishte në gjendje të mirë mendore. “Atë ditë Arlindi nuk ka qenë në vete. Sapo u ktheva nga Prizreni shkova të pushoja pak. Mendova se hyri gruaja në dhomë, e pastaj pash që ishte Arlindi dhe menjëherë e ndjeva goditjen me sëpatë në pjesën e majtë të kokës, prapa veshit. I thashë: ‘Arlind, çka bane?’, por ai nuk thojke ma sen” – tha S.S.
Ai tregoi se menjëherë ishte përpjekur ta largonte djalin dhe t’ia merrte sëpatën. “Më pas për ta ndalur e godita dy herë me shkelma vetëm që ta largoja nga vetja. Kur pa gjakun, ai u kthjell dhe iku nga shtëpia, duke e lënë sëpatën në ballkon” – tha S.S.
Sipas dëshmitarit, në vendin e ngjarjes nuk kishte dëshmitarë të tjerë dhe bashkëshortja kishte hyrë në dhomë vetëm pasi ai kishte kërkuar ndihmë. Duke u përgjigjur në pyetjet e prokurorit, S.S. tha se shkaku i konfliktit kishte qenë përpjekja e tij që ta pajiste djalin me dokumentacion për përfitimin e ndihmës sociale, pasi mjeku psikiatër kishte vlerësuar se ai nuk ishte i aftë për punë.
“Arlindi kishte qejf me punu, por nuk mundej. Doktori më tha se nuk ishte i aftë për punë. Unë i dorëzova dokumentet për ndihmë sociale, por ai u hidhërua dhe më tha: ‘Pse më ke bërë të paaftë?’. Më kërkoi t’i tërhiqja dokumentet dhe unë i tërhoqa. Krejt kjo ka qenë arsyeja e rastit”, tha ai.
Ai shtoi se djali i tij ishte trajtuar për rreth dhjetë vjet nga psikiatri, por gjendja e tij ishte përkeqësuar pasi kishte ndërprerë terapinë. Pas përfundimit të dëshmisë së të dëmtuarit, gjykata vazhdoi me administrimin e provave materiale.
U lexuan raporti i policisë, procesverbalet e bastisjes, kontrollit dhe sekuestrimit të përkohshëm, lista e dëshmive të sekuestruara, raporti i këqyrjes së vendit të ngjarjes, fotoalbumi, raporti mjekësor i Spitalit Rajonal të Prizrenit, ekspertiza mjekoligjore e Dr. Naim Halitit, si dhe raporti i Institutit të Psikiatrisë Forenzike të Kosovës.
Pas përfundimit të fjalëve përfundimtare, trupi gjykues u tërhoq, me kryetare Sadije Selmani si dhe antarë Ilir Rashkaj dhe Teuta Krusha, për këshillim dhe vendosi që shpallja e aktgjykimit të bëhet më . Qka thuhet në aktakuzë?
Sipas aktakuzës, më , rreth orës , në rrugën “Liqeni i Lurës”, në fshatin Lubizhdë të Komunës së Prizrenit, saktësisht në shtëpinë e tij familjare, i pandehuri, në gjendje të aftësisë së zvogëluar mendore në shkallë esenciale, me dashje ka tentuar ta privojë nga jeta anëtarin e familjes – babain e tij, të dëmtuarin S.S.
Në aktakuzë thuhet se, për shkak të problemeve të vazhdueshme familjare që kishin mes tyre, pas një fjalosjeje me të dëmtuarin, i pandehuri kishte shkuar në oborrin e shtëpisë, ku kishte marrë një sëpatë dhe, i pajisur me të njëjtën, kishte hyrë në dhomën e gjumit, ku i dëmtuari ishte duke fjetur, dhe e kishte goditur atë në anën e pasme të majtë të kokës.
Sipas aktakuzës, si pasojë e goditjes, i dëmtuari kishte pësuar plagë prerëse në anën e majtë të kokës, në regjionin tëmthor-pas veshit të majtë e deri te qafa, të shkaktuara nga mjeti i fortë dhe i rëndë me teh, duke pësuar dëmtim të përkohshëm të shëndetit.
Lëndimet janë kualifikuar si lëndime të lehta trupore, sipas akt-ekspertimit mjekoligjor të 10 shkurtit 2026, të përgatitur dhe konstatuar nga Dr. Naim Haliti. Me këto veprime, sipas aktakuzës, ai akuzohet se ka kryer veprën penale “vrasje e rëndë” e mbetur në tentative. TENTIM VRASJE, ARLIND SADIKU, TEUTA KRUHSA, VRASJE NË TENTATIVË, SADIJE SELMANI, ILIR RASHKAJ, GJYKATA E PRIZRENIT