Vita Abrashi-Kajtazi Shpërndaje në: Një studim i madh ndërkombëtar ka identifikuar faktorë të rinj gjenetikë që lidhen me fibromialgjinë, sëmundje kronike që shkakton dhimbje të përhapura në trup, lodhje të vazhdueshme dhe vështirësi me kujtesën e përqendrimin, ka shkruar The Independent .
Studiuesit analizuan ADN-në e më shumë se 2.5 milionë personave nga Britania, SHBA-ja, Finlanda, Danimarka, Islanda dhe Estonia, përfshirë rreth 55 mijë persona të diagnostikuar me fibromialgji. Rezultatet zbuluan 26 variante gjenetike që lidhen me rrezikun për zhvillimin e kësaj sëmundjeje.
“Duke studiuar ADN-në e më shumë se dy milionë njerëzve, mund të themi me besim se këto rezultate janë të sakta dhe tregojnë se fibromialgjia është një çrregullim i mënyrës se si truri përpunon dhimbjen”, ka thënë profesoresha Frances Williams nga King’s College London.
Ekspertët theksojnë se për shumë vite pacientëve me fibromialgji u është thënë se dhimbjet e tyre ishin vetëm psikologjike. “Për dekada me radhë, pacientët janë shpërfillur ose u është thënë se dhimbja e tyre ishte vetëm psikologjike. Gjetjet tona konfirmojnë se kjo sëmundje ka një bazë të qartë biologjike”, ka thënë doktori Michael Wainberg nga Universiteti i Torontos.
Edhe Lifestyle 2 tet 2025 Më shumë të rinj po preken nga kanceri, por pse? Studimi ka zbuluar gjithashtu një lidhje mes fibromialgjisë dhe gjenit HTT, mutacionet e të cilit shkaktojnë sëmundjen e Huntingtonit. Sipas studiuesve, kjo mund të hapë rrugën që ilaçet që po testohen për Huntingtonin të përdoren në të ardhmen edhe për trajtimin e fibromialgjisë.
Po ashtu, u vu re se fibromialgjia ndan faktorë gjenetikë me sëmundje të tjera, si dhimbja kronike e mesit, sindroma e zorrës së irrituar, si edhe shpesh shoqërohet me ankth dhe depresion.
Ekspertët theksojnë se nevojiten kërkime të mëtejshme për të kuptuar më mirë se si ndërveprojnë gjenet, mjedisi dhe ngjarjet e jetës në zhvillimin e fibromialgjisë, me synimin për të krijuar trajtime më efektive në të ardhmen.