Deçiqi i Tuzit e nisi me humbje aventurën evropiane, pasi në ndeshjen e parë të rrethit të parë kualifikues të Conference Leagues u mposht në transfertë nga skuadra letoneze Liepaja me rezultat 1:0.
Edhe pse nga minuta e 22-të vendasit mbetën me një futbollist më pak pas përjashtimit të kapitenit Marvin Martins, skuadra shqiptare nuk arriti ta shfrytëzojë epërsinë numerike dhe u kthye nga Letonia pa rezultat pozitiv. Nën shi dhe erë, Deçiqi pati kontroll më të madh të topit pas kartonit të kuq për vendasit dhe krijoi disa raste të mira në pjesën e parë.
Kapiteni Xhonatan Dreshaj ishte shumë aktiv në krah, ndërsa Petar Pavliçeviq pati dy mundësi të mira, por nuk arriti ta mposhtte portierin kundërshtar. Rast të mirë pas një goditjeje nga këndi pati edhe mbrojtësi Nikola Braunoviq. Në pjesën e dytë ritmi i lojës ra. Balsha Radusinoviq provoi nga distanca, por pa sukses, ndërsa Liepaja u tregua shumë më e rrezikshme në kundërsulme.
Paralajmërimi erdhi në minutën e 62-të, kur Amar Hajdara i shpëtoi mbrojtjes së Deçiqit, por portieri Danilo Radosheviq shpëtoi ekipin e tij me një pritje të shkëlqyer. Vetëm dy minuta më vonë erdhi edhe goli vendimtar. Pas një gabimi të rëndë të Pavliçeviqit në mesfushë, Liepaja organizoi një kundërsulm të shpejtë.
Hajdara asistoi në mënyrë perfekte për Edea Oloko, i cili realizoi pa vështirësi për rezultatin përfundimtar 1:0. Deri në fund Deçiqi u përpoq të reagojë, por nuk krijoi raste serioze për të barazuar. Tani skuadra nga Tuzi do të kërkojë përmbysjen në ndeshjen e kthimit pas shtatë ditësh në fushën e saj.