Mediat shtetërore dhe ato të lidhura me shtetin në Iran raportojnë se centrali bërthamor i Bushehrit është vënë në shënjestër gjatë sulmeve të së mërkurës. Sipas një deklarate të publikuar nga mediat shtetërore iraniane dhe që i atribuohet zëvendësguvernatorit të provincës, perimetri i centralit është goditur nga predha të lëshuara nga Shtetet e Bashkuara.
Deri më tani, SHBA-ja nuk ka komentuar lidhur me këto pretendime. Nëse konfirmohet, sulmi pranë centralit bërthamor të Bushehrit do të përbënte një nga zhvillimet më serioze të konfliktit, me pasoja të mundshme për sigurinë rajonale dhe ndërkombëtare. Ekspertët paralajmërojnë se një sulm ndaj një objekti bërthamor mund të shkaktojë rrjedhje rrezatimi në mjedis.
Një skenar i tillë në Gjirin Persik do të paraqiste rrezik të madh për vendet arabe të rajonit. Termocentrali bërthamor i Bushehrit është ndërtuar me ndihmën e Rusisë dhe konsiderohet një nga objektet strategjike më të rëndësishme të Iranit. Ndërkohë, përplasjet mes palëve kanë vazhduar edhe në fronte të tjera.
Forcat e armatosura të Jordanisë njoftuan përmes agjencisë shtetërore të lajmeve Petra se sistemet e mbrojtjes ajrore kanë rrëzuar tetë raketa të lëshuara nga Irani. Sipas autoriteteve jordaneze, disa copëza raketash kanë rënë në tokë, por nuk është raportuar për viktima apo dëme materiale. SHBA-ja, e cila ka një bazë ushtarake në Jordani, nuk ka reaguar ende për këtë zhvillim.
Megjithatë, Ambasada e SHBA-së në Jordani u ka bërë thirrje qytetarëve amerikanë të kërkojnë strehim, pasi sipas saj “raportimet tregojnë se raketa, dronë ose predha ndodhen në hapësirën ajrore të Jordanisë”. Ambasada bëri të ditur se po monitoron situatën dhe se do të japë informacione shtesë sapo të ketë zhvillime të reja.
Shtetet e Bashkuara nisën një raund të ri sulmesh ajrore kundër Iranit të mërkurën, vetëm pak orë pasi presidenti Donald Trump deklaroi se armëpushimi mes dy vendeve mund të ketë “përfunduar”. Sulmet vijnë një ditë pasi ushtria amerikane goditi disa objektiva ushtarake iraniane, pas sulmeve të Teheranit ndaj anijeve tregtare në brigjet e Omanit. Sinjali – aty ku e vërteta flet para lajmit!