Erling Haaland ka pranuar se fitorja historike e Norvegjisë ndaj Brazilit ende i duket si diçka e pabesueshme. Sulmuesi i Manchester Cityt ishte protagonisti kryesor i triumfit norvegjez, duke shënuar dy gola në fund të ndeshjes dhe duke siguruar kualifikimin e kombëtares së tij në çerekfinalet e Kupës së Botës.
Norvegjia mposhti pesë herë kampionët e botës me rezultat 2-1 në New Jersey, në një nga surprizat më të mëdha të këtij Botërori. Haaland zhbllokoi rezultatin në minutën e 79-të, pas një goditjeje të saktë me kokë, ndërsa në minutën e 90-të realizoi edhe golin e dytë me një goditje të ulët, duke vulosur fitoren historike të norvegjezëve. Ndeshja pati edhe momente dramatike.
Bruno Guimaraes dështoi nga pika e bardhë në pjesën e parë për Brazilin, ndërsa Neymar shënoi penalltinë në sekondat e fundit të takimit, por goli i tij nuk mjaftoi për të ndryshuar fatin e ndeshjes. Pas përfundimit të takimit, Haaland foli në kanalin e tij personal në YouTube, ku tregoi emocionet pas triumfit ndaj një prej kombëtareve më të mëdha në historinë e futbollit.
“Brazili është një komb futbolli. Ndoshta është vendi i parë që mëson kur fillon të ndjekësh futbollin, për shkak të të gjithë legjendave që kanë luajtur aty. Fanella, vendi, pasioni, të gjithë emrat e mëdhenj që kanë pasur. Është paksa e pabesueshme të luash kundër Brazilit”, tha Haaland.
Sulmuesi norvegjez tha se fakti që Brazili konsiderohej favorit i madh para ndeshjes i kishte ndihmuar ata të luanin me më pak presion. Ai pranoi se asnjëherë nuk e kishte menduar se Norvegjia do të mund ta mposhte një skuadër me kaq shumë yje. “Ende më duket e pabesueshme, si diçka shumë e largët.
Nuk e kisha imagjinuar kurrë se mund të ndodhte, prandaj fakti që vërtet arritëm ta mposhtim Brazilin më duket edhe më surreal. Ka qenë e jashtëzakonshme. Më duhet të qetësohem dhe të fle pak, sepse jam plotësisht i rraskapitur. Kjo është e mrekullueshme dhe të lë pa frymë”, u shpreh ai.
Me këtë fitore, Norvegjia ka shkruar histori duke siguruar për herë të parë një vend në çerekfinalet e Kupës së Botës. Paraqitja e portierit Orjan Nyland dhe forma e jashtëzakonshme e Haalandit kanë rritur besimin në kampin norvegjez.
Haaland tashmë ka barazuar Kylian Mbappen me shtatë gola në garën për “Këpucën e Artë”, duke e bërë edhe më interesante betejën për golashënuesin më të mirë të turneut. Në çerekfinale, Norvegjia do të përballet me Anglinë, të shtunën në Miami. Kombëtarja angleze vjen pas fitores ndaj Meksikës dhe synon të vazhdojë rrugëtimin drejt fazave finale.
Nga ana tjetër, norvegjezët hyjnë në këtë përballje me moral të lartë pas eliminimit të Brazilit dhe me Haalandin në formën më të mirë. Për Norvegjinë, ëndrra vazhdon, ndërsa për Haalandin fitorja ndaj Brazilit mbetet një moment që ende duket i vështirë për t’u besuar. Sinjali – aty ku e vërteta flet para lajmit!