Franca dhe Maroku do ta hapin sonte fazën çerekfinale të Kupës së Botës 2026, në një përballje që pritet të jetë ndër më emocionueset e kësaj faze. Ndeshja do të zhvillohet në “Boston Stadium” në Foxborough, me fillim nga ora sipas kohës sonë, ndërsa fituesi do ta sigurojë biletën për në gjysmëfinale, ku do të përballet me fituesin e çiftit Spanjë–Belgjikë.
Për Francën, kjo është një tjetër mundësi për të vazhduar rrugëtimin drejt majave të futbollit botëror. “Gjelat” kanë ardhur deri në çerekfinale pas një ecurie të sigurt, duke eliminuar fillimisht Suedinë me rezultat 3:0, e më pas Paraguain me rezultat 1:0 në fazën e 1/8 së finales. Në anën tjetër, Maroku kërkon të shkruajë një tjetër faqe të artë në historinë e futbollit.
Kombëtarja afrikane, që në Botërorin e vitit 2022 kishte mahnitur botën duke arritur deri në gjysmëfinale, tani synon ta përsërisë, madje ta kalojë atë sukses historik. Kjo përballje ka edhe një peshë të veçantë emocionale për marokenët. Katër vite më parë, pikërisht Franca ia kishte ndalur ëndrrën Marokut në gjysmëfinalen e Botërorit në Katar, duke e mposhtur 2:0.
Sonte, “Luanët e Atlasit” do të kërkojnë revanshin dhe një vend në mesin e katër kombëtareve më të mira të botës. Maroku vjen në këtë ndeshje pas fitores bindëse 3:0 ndaj Kanadasë në 1/8 e finales, ndërsa më herët kishte eliminuar Holandën pas penalltive në një duel dramatik.
Kjo ecuri e ka rritur edhe më shumë besimin te skuadra marokene, e cila tashmë nuk shihet më si befasi, por si një ekip serioz që mund të sfidojë çdo kundërshtar. Megjithatë, para sfidës së sotme, Maroku ka marrë një goditje të rëndësishme.
Ismael Saibari, një nga lojtarët më të dalluar të kësaj kombëtareje në këtë Botëror, raportohet se nuk është i gatshëm për ndeshjen për shkak të një lëndimi muskulor. Mungesa e tij mund të jetë hendikep i madh për repartin ofensiv të Marokut. Franca, në anën tjetër, do të mbështetet te cilësia dhe përvoja e saj e madhe në ndeshjet vendimtare.
Kylian Mbappe mbetet arma kryesore e francezëve, ndërsa skuadra e Didier Deschamps ka në dispozicion një repart sulmues me shumë zgjidhje dhe një ekip që di si të menaxhojë presionin e fazave finale.
Përballja pritet të jetë edhe një duel stilesh: Franca me ritëm, shpejtësi dhe individualitet të jashtëzakonshëm në sulm, ndërsa Maroku me organizim të fortë, disiplinë taktike dhe kundërsulme të rrezikshme. Sonte nis kështu beteja për katërshen më të mirë të Botërorit.
Franca kërkon të konfirmojë statusin e favorites, ndërsa Maroku kërkon të dëshmojë se suksesi i vitit 2022 nuk ishte rastësi, por fillimi i një kapitulli të ri për futbollin afrikan dhe arab. Çerekfinalet do të vazhdojnë të premten me ndeshjen Spanjë–Belgjikë, ndërsa gjatë fundjavës do të zhvillohen edhe dy përballjet e tjera: Norvegji–Angli dhe Argjentinë–Zvicër.