Aktorja fituese e çmimit Oscar, Penelope Cruz, ka bërë të ditur se është gati të përballet me një nga frikërat më të mëdha të jetës së saj, duke nisur procesin për të marrë patentën e shoferit në moshën 52-vjeçare. Gjatë një interviste të fundit, Cruz zbuloi se nuk ka drejtuar kurrë makinë për shkak të ankthit të fortë që përjeton sa herë udhëton me automjet.
Megjithatë, një dhuratë e veçantë nga miku i saj i ngushtë, këngëtari Bono, i ka dhënë motivimin për të ndryshuar këtë situatë. “Kur mora një makinë dhuratë, mendova se kishte ardhur koha ta sfidoja veten. Nuk mund të vazhdoj ta kem makinën pa ditur ta drejtoj”, është shprehur aktorja.
Ajo tregoi se frika e saj buron nga një ngjarje e rëndë e fëmijërisë, kur pa motrën e saj të goditej nga një makinë. Sipas Cruz, ajo përvojë ka lënë gjurmë të thella emocionale dhe vazhdon të ndikojë në mënyrën se si e përjeton udhëtimin me automjet. Aktorja beson se kjo është një fobi e njohur, pasi shumë persona përballen me ankth të ngjashëm gjatë drejtimit ose udhëtimit me makinë.
Ndërkohë, edhe bashkëshorti i saj, aktori Javier Bardem, ka pranuar se nuk është shumë i apasionuar pas drejtimit të automjeteve, duke bërë që çifti të mbështetet shpesh te shoferët ose transporti publik gjatë udhëtimeve. Pavarësisht frikës që e ka shoqëruar për dekada, Penelope Cruz duket e vendosur që këtë herë ta kapërcejë pengesën dhe të fitojë më në fund pavarësinë pas timonit.
Sinjali – aty ku e vërteta flet para lajmit!