Një anije mallrash është goditur në Ngushticën e Hormuzit, në një incident që rrit sërish tensionet në rajon dhe vë në pikëpyetje zbatimin e marrëveshjes së fundit mes Shteteve të Bashkuara dhe Iranit. Sipas një zyrtari amerikan, sulmi është kryer me një dron iranian, megjithëse Teherani nuk ka marrë zyrtarisht përgjegjësinë.
Ngjarja ndodhi vetëm disa orë pasi Garda Revolucionare Iraniane deklaroi se anijet do të lejohen të kalojnë të sigurta vetëm përmes rrugëve detare të miratuara nga Irani, duke sfiduar pretendimet e administratës Trump se lundrimi në Ngushticën e Hormuzit ishte rikthyer në normalitet pas marrëveshjes së arritur javën e kaluar.
Sipas Operacioneve të Tregtisë Detare të Mbretërisë së Bashkuar (UKMTO), anija u godit në anën e djathtë nga një predhë e paidentifikuar, duke pësuar dëmtime në urën komanduese. Fatmirësisht nuk u raportuan viktima apo ndotje mjedisore, ndërsa autoritetet u kërkuan të gjitha anijeve që kalojnë në zonë të tregojnë kujdes maksimal dhe të raportojnë çdo aktivitet të dyshimtë.
Sulmi pati pasoja të menjëhershme edhe në operacionet ndërkombëtare. Organizata Ndërkombëtare Detare e OKB-së (IMO) njoftoi pezullimin e misionit për evakuimin e qindra anijeve dhe mbi 11 mijë detarëve që kanë mbetur të bllokuar në Gjirin Persik që prej shpërthimit të konfliktit.
Sekretari i Përgjithshëm i IMO-së, Arsenio Dominguez, deklaroi se siguria e detarëve mbetet prioritet absolut dhe se plani i evakuimit do të qëndrojë i pezulluar derisa të ketë sqarime të plota për situatën. Ai theksoi se anija e sulmuar nuk ishte pjesë e operacionit të evakuimit, por incidenti tregon se rreziku në zonë mbetet i lartë.
Ndërkohë, Organizata Iraniane për Menaxhimin e Rrugëve Detare të Gjirit Persik paralajmëroi se nuk garanton më kalim të sigurt për anijet që nuk ndjekin korridoret e përcaktuara nga Teherani. Sipas autoriteteve iraniane, përgjegjësia për çdo incident do të bjerë mbi pronarët, operatorët dhe kapitenët e anijeve që zgjedhin rrugë të tjera.
Ngjarja ka ndikuar menjëherë edhe në tregjet ndërkombëtare, duke sjellë një rritje të çmimit të naftës. Nafta Brent u mbyll me një rritje prej rreth 2%, në 74 dollarë për fuçi, pas shqetësimeve se tensionet në një nga rrugët më të rëndësishme të transportit të naftës në botë mund të përshkallëzohen.
Marrëveshja e nënshkruar javën e kaluar mes SHBA-së dhe Iranit synon ndalimin e luftimeve, garantimin e lundrimit të lirë në Ngushticën e Hormuzit dhe lehtësimin e sanksioneve ndaj Teheranit në këmbim të angazhimit për të mos zhvilluar armë bërthamore.
Megjithatë, incidenti i fundit tregon se situata mbetet e brishtë dhe negociatat që pritet të nisin më 30 qershor do të zhvillohen në një klimë të tensionuar.