Samuele Ricci është shumë pranë largimit nga Milani. Mesfushori italian pritet të bëhet lojtari më i ri i Como-s, me klubet që po punojnë për të finalizuar detajet e fundit të transferimit. Ricci do t’i bashkohet skuadrës së drejtuar nga Cesc Fabregas në formën e huazimit me të drejtë blerjeje, e cila është përcaktuar në 25 milionë euro.
Marrëveshja është në fazën përfundimtare dhe pritet të zyrtarizohet së shpejti. Mesfushori, i lindur në vitin 2001, iu bashkua Milanit në verën e vitit 2025, por nuk arriti të fitonte një rol të qëndrueshëm në formacion. Në aventurën e tij me kuqezinjtë, Ricci regjistroi 34 paraqitje, një gol dhe katër asistime, duke luajtur gjithsej 1498 minuta.
Tashmë, lojtari po përgatitet për një kapitull të ri në karrierë te Como, ku pritet të ketë më shumë hapësira për të treguar vlerat e tij. Transferimi shihet gjithashtu si një mundësi për t’u rikthyer në qendër të vëmendjes pas një sezoni të komplikuar në Milano, ku nuk arriti të ngjitej në mënyrë të qëndrueshme në hierarkinë e trajnerit Massimiliano Allegri.