Qeveria bullgare pritet të propozojë ndryshime legjislative për të trajtuar dhunën te të rinjtë deri në fund të shtatorit, ka deklaruar kryeministri Rumen Radev. Duke folur me gazetarët në qytetin e Plovdivit, Radev tha se situata me disa të rinj është “jashtëzakonisht shqetësuese” dhe kërkon masa konkrete nga institucionet.
Deklaratat e kryeministrit vijnë pas vrasjes së 37-vjeçarit Georgi Kuzev në Kodrën e të Rinjve në Plovdiv, më 4 gusht. Pas incidentit u arrestuan 10 adoleshentë, të moshave 14 deri në 17 vjeç. Pesë prej tyre, tre djem dhe dy vajza, janë akuzuar për vrasje dhe janë lënë në paraburgim.
Radev kritikoi funksionimin e komisioneve lokale komunale, duke theksuar nevojën për më shumë punë parandaluese në shkolla dhe bashkëpunim me prindërit.
“Ne duhet ta nxjerrim në pah punën në shkolla dhe me prindërit në mënyrë që gjëra të tilla të mos ndodhin”, deklaroi ai.Kryeministri bullgar bëri të ditur gjithashtu se qeveria po shqyrton edhe mundësinë e vendosjes së kufizimeve për qasjen e adoleshentëve në mediat sociale, si pjesë e masave për të parandaluar dhunën dhe sjelljet problematike te të rinjtë.