Shkëndija e Haraçinës është gati të shkruajë një tjetër faqe historike në elitën e futbollit të Maqedonisë. Këtë të premte, skuadra do ta zhvillojë ndeshjen e saj të parë si vendase në Ligën e Parë të Maqedonisë së Veriut, ku në stadiumin e Çairit do të përballet me Sileksin.
Pas fillimit të vështirë të sezonit dhe humbjes ndaj kampionit Struga Trim Lum, drejtuesit e klubit nuk qëndruan duarkryq: mbrojtja është përforcuar me emra të rinj gjatë afatit kalimtar, për t’i dhënë ekipit më shumë siguri. Portieri Antonio Stolevski thekson se gabimet nga java e parë tashmë i përkasin së kaluarës. “Nga ndeshja kundër Strugës kemi nxjerrë mësimet e nevojshme.
Ajo sfidë ka përfunduar dhe mendimet tona janë 100% të përqendruara te sfida e radhës”, deklaroi Stolevski. Sileksi vjen në Çair me moral të lartë, pas fitores bindëse 6:0 ndaj Bashkimit.
“Sileksi është një kundërshtar cilësor që meriton respekt maksimal, por ne do të luftojmë për çdo top në fushë, nga minuta e parë deri te fishkëllima e fundit e gjyqtarit.” Stolevski pati edhe një mesazh të qartë për opinionin sportiv dhe tifozët besnikë. “Nuk jemi rastësisht në Ligën e Parë dhe nuk kemi ardhur këtu për të luajtur një rol episodik.
I ftoj të gjithë tifozët tanë ta mbushin stadiumin e Çairit dhe të jenë lojtari ynë i 12-të drejt fitores së parë historike në fushën tonë.” Ndeshja Shkëndija– Sileksi zhvillohet sot (7 gusht), me fillim nga ora , në stadiumin e Çairit.