Sot është dita e 56-të e protestave patriotike për Triumfin e Kombit mbi politikën e vjetër, mbi korrupsionin, mbi tradhtinë publike dhe mbi regjimin 35-vjeçar të sistemit antipublik të hajdutokracisë. Këto janë protestat më të mëdha në historinë e Shqipërisë, të cilat kanë karakter thellësisht patriotik e kombëtar.
Pa gjallërinë rinore, pa mendimin intelektual dhe pa mediat e lira e të pavarura, demokracia bie në koma. Sot, në Tiranë, kemi rininë që proteston, por nuk janë gjëkundi as mediat dhe as intelektualët në mbështetje të kauzave kombëtare të protestave rinore e qytetare. Ato karakterizohen nga heshtja dhe indiferentizmi hipokrit e djallëzor.
Madje, jo vetëm kaq, por bëjnë të kundërtën, saqë shprehen kundër këtyre protestave. PRA, MEDIAT DHE INTELEKTUALËT PO BËJNË KËSHTU TRADHTINË MEDIATIKE E INTELEKTUALE. Pse, pyet ndokush? Dhe ja përgjigjja ime: Është detyrë e intelektualëve dhe, sidomos, e mediave që të informojnë në mënyrë të vërtetë dhe reale qytetarin dhe opinionin publik për gjithçka që ndodh në shoqërinë demokratike.
Intelektualët pozitivistë dhe të guximshëm, si dhe mediat e lira e të pavarura, janë rojet e demokracisë; janë ato që duhet të kontrollojnë qeverinë, politikën dhe pushtetin.
Mediat duhet të përcjellin zërin dhe të jenë në anën e protestave qytetare dhe të shqetësimeve të tyre, të japin informacion për zërin e protestave, si në rastin e këtyre protestave rinore, më të mëdhatë e zhvilluara në historinë e Shqipërisë, protesta në emër të lirisë, dinjitetit dhe patriotizmit, si protesta që kundërshtojnë korrupsionin, hajninë dhe tradhtinë.
Intelektualët patriotë dhe mediat, zëri i gazetarëve, spikerëve dhe analistëve, duhet të jenë të guximshëm, ashtu sikurse është zëri qytetar në këto protesta kundër padrejtësive, eksodit, varfërisë dhe korrupsionit. Fatkeqësisht, kjo nuk po ndodh ende dhe mediat e intelektualët, në të shumtën e tyre, janë në anën jo të duhur të historisë.