Një pastor 55-vjeçar nga Florida ka ngritur padi ndaj OpenAI-t dhe bashkëthemeluesit të saj, Sam Altman, duke pretenduar se këshillat mjekësore të marra nga ChatGPT e kishin çuar në prag të vdekjes.
Sipas padisë së paraqitur më 21 korrik në Gjykatën e Lartë të Qarkut të San Franciskos, Scott Winters pretendon se chatbot-i e kishte këshilluar të mos kërkonte ndihmë mjekësore, pavarësisht simptomave që më vonë rezultuan të lidhura me një embolizëm pulmonar pothuajse fatal.
Avokatët e tij pretendojnë se ChatGPT e kishte diagnostikuar gabimisht në mënyrë të përsëritur, ndërsa kishte përdorur edhe besimin e tij fetar për ta bindur se gjendja shëndetësore do të përmirësohej. Winters ishte përdorues i rregullt i platformës dhe, sipas dokumenteve gjyqësore, kishte filluar të mbështetej gjithnjë e më shumë në të për këshilla shëndetësore.
Ai dyshohet se kishte refuzuar edhe kërkesat e familjarëve dhe miqve për t’u paraqitur në spital. Disa javë para se gjendja t’i përkeqësohej, 55-vjeçari e kishte pyetur ChatGPT-n për marramendje të përsëritura dhe luhatje të presionit të gjakut.
Padia pretendon se atij iu rekomandua të vazhdonte të qëndronte në një karrige të shtrirë, ku kalonte pjesën më të madhe të kohës për shkak të problemeve shëndetësore. Më vonë, Winters pësoi embolizëm masiv pulmonar si pasojë e mpiksjeve të shumta të gjakut në të dyja mushkëritë. Sipas padisë, mjekët i kishin thënë se gjendja mund të ishte shkaktuar nga mungesa e lëvizjes.
Në dokumentet gjyqësore pretendohet se chatbot-i kishte kombinuar këshillat shëndetësore me referenca ndaj besimit të tij të krishterë, duke i thënë se Zoti vazhdonte ta mbante trupin e tij në funksion.
Avokatët pretendojnë se toni autoritar dhe pajtues i përgjigjeve kishte krijuar një varësi të rrezikshme, duke e larguar Wintersin nga familjarët që e këshillonin të kërkonte trajtim profesional. Përfaqësuesi i OpenAI-t, Drew Pusateri, ka deklaruar se ChatGPT nuk është mjek dhe nuk duhet të përdoret si zëvendësim për diagnostikimin, trajtimin apo kujdesin mjekësor.
Edhe udhëzimet zyrtare të OpenAI-t theksojnë se mjeti mund të ndihmojë në kuptimin dhe organizimin e informacioneve shëndetësore, por nuk e zëvendëson vlerësimin e profesionistëve të kualifikuar. Winters kërkon dëmshpërblim financiar, si dhe vendosjen e masave shtesë mbrojtëse që, sipas tij, do të parandalonin raste të ngjashme me përdorues të tjerë.
Pretendimet e paraqitura në padi ende nuk janë vërtetuar nga gjykata. Sinjali – aty ku e vërteta flet para lajmit!