Chelsea po lëviz për të transferuar një tjetër yll të Premierligës, pasi theu rekordin e klubit me blerjen e Morgan Rogers për 117 milionë funte. Pasi mbeti jashtë garave evropiane sezonin e kaluar, klubi londinez nuk po humb kohë këtë verë dhe rindërtimi i madh nën drejtimin e trajnerit të ri, Xabi Alonso, është në zhvillim e sipër.
Chelsea dha një sinjal të qartë për ambiciet e saj duke arritur marrëveshje për transferimin e yllit të Anglisë dhe Aston Villas, Morgan Rogers. Rogers raportohej se ishte shumë pranë kalimit te kampioni i Premierligës, Arsenali, por Chelsea ndërhyri në momentet e fundit dhe arriti të sigurojë marrëveshjen.
Ish-lojtari i akademisë së Manchester Cityt pritet të bëhet përforcimi i tretë i madh i Chelseat këtë verë, pas afrimeve të Geovany Quenda dhe Marco Palestra. Megjithatë, shpenzimet e Chelseat nuk kanë përfunduar, pasi raportimet bëjnë të ditur se klubi ka nisur bisedimet zyrtare për një tjetër futbollist të Premier League, i cili ishte pjesë e Kupës së Botës.
Sipas gazetarit Ben Jacobs, klubi nga Londra Perëndimore është në negociata për mbrojtësin qendror të Crystal Palace, Maxence Lacroix. Lacroix iu bashkua Crystal Palace nga Wolfsburgu në vitin 2024 dhe ndihmoi “Shqiponjat” të fitonin FA Cup dhe Ligën e Konferencës në një sezon përrallor nën drejtimin e Oliver Glasner.
Pas afro 100 paraqitjeve me Crystal Palace, mbrojtësi francez duket se është gati për një hap të ri në karrierë, pas pjesëmarrjes së tij të parë në Kupën e Botës me Francën. Raportohet se Crystal Palace, që vitet e fundit ka shitur disa nga yjet e saj për shuma të mëdha, e vlerëson Lacroix me të paktën 55 milionë funte.
Klubi londinez ka vendosur këtë çmim pasi pa mbrojtësin holandez Jan Paul van Hecke t’i bashkohej Tottenhamit nga Brightoni për një shumë të ngjashme. Ashtu si në garën për Morgan Rogers, edhe Arsenali thuhet se është i interesuar për Maxence Lacroix. Lacroix shkoi në Kupën e tij të parë të Botës si alternativë pas dyshes titullare William Saliba dhe Dayot Upamecano.
Megjithatë, ai zhvilloi tri paraqitje me Francën, e cila e mbylli turneun në vendin e katërt. Ai ishte titullar në ndeshjet ndaj Norvegjisë dhe Anglisë, ndërsa u aktivizua si zëvendësues pas dëmtimit të Salibas në gjysmëfinalen e humbur ndaj Spanjës.
Para se Xabi Alonso të merrte drejtimin e Chelseat, klubi kishte arritur gjithashtu marrëveshje për transferimin e Denner, Dastan Satpaev dhe Emmanuel Emegha. Sipas “Faktor”, Alonso dëshiron të përforcohet edhe me një futbollist nga ish-klubi i tij, Bayer Leverkusen, duke synuar talentin Kerim Alajbegovic, i cili shkëlqeu me Bosnje dhe Hercegovinën në Kupën e Botës.
Goli i tij spektakolar kundër Katarit e bëri lojtarin më të ri që shënon nga jashtë zonës së penalltisë që nga fillimi i mbledhjes së statistikave të detajuara në vitin 1966. Ai u rikthye te Bayer Leverkusen vetëm në muajin mars, pasi klubi aktivizoi klauzolën e riblerjes për ta rikthyer nga Red Bull Salzburg.
Megjithatë, Alonso është një admirues i madh i tij dhe mund të miratojë një tjetër transferim. Sa i përket largimeve, Chelsea raportohet se është e gatshme të dëgjojë oferta për pesë futbollistë, përfshirë Alejandro Garnacho, Benoit Badiashile, Axel Disasi dhe Liam Delap.
Në anën tjetër, Reece James, Cole Palmer, Levi Colwill, Moises Caicedo, Joao Pedro, Estevao dhe Josh Acheampong konsiderohen të paprekshëm në “Stamford Bridge”.