Pesë persona u vranë në sulmet izraelite në Rripin e Gazës, thanë mjekët në një spital lokal. Enklava palestineze është shënjestruar rregullisht pavarësisht armëpushimi që hyri në fuqi tetorin e kaluar. “Tre persona u vranë dhe shumë të tjerë u plagosën kur një dron izraelit goditi një grup civilësh” , tha Spitali Al-Aqsa në Deir el-Bala, në sektorin qendror të enklavës.
Një fëmijë ishte midis të vdekurve. Mbrojtja Civile, një agjenci e ndihmës së shpejtë e lidhur me lëvizjen palestineze Hamas, konfirmoi sulmin në Deir el-Bala. Një burim ushtarak izraelit, duke folur për AFP, tha se objektivi ishin “terroristët xhihadistë” dhe se rezultati i sulmit ishte “nën shqyrtim”.
Mbrojtja Civile raportoi gjithashtu se dy persona u vranë dhe më shumë se 27 u plagosën në një sulm tjetër, në një tendë në plazhin e Khan Younis, në Rripin jugor të Gazës. Izraeli dhe Hamasi akuzojnë njëri-tjetrin pothuajse çdo ditë për shkelje të armëpushimit.
Të paktën 1,045 palestinezë janë vrarë që kur armëpushimi hyri në fuqi, sipas ministrisë së shëndetësisë të enklavës, e cila është gjithashtu nën kontrollin e Hamasit, por shifrat që ajo shpall konsiderohen të besueshme nga OKB-ja. Gjatë së njëjtës periudhë, Izraeli ka numëruar gjashtë të vdekur, pesë ushtarë dhe një kontraktor të ministrisë së mbrojtjes.
Kufizimet në media dhe qasja e kufizuar në Gaza e bëjnë të vështirë për gazetarët nga agjencitë ndërkombëtare të verifikojnë informacionin që marrin nga burime të pavarura.