Gjatë ceremonisë mortore për ish-udhëheqësin suprem iranian, Ali Khamenei, janë bërë thirrje të ashpra kundër presidentit amerikan Donald Trump dhe kryeministrit izraelit Benjamin Netanyahu. Duke folur para lutjeve për trupin e Khameneit, ligjëruesi Mohammad Rasouli deklaroi se vrasja e Trumpit është “detyrë”, duke pyetur turmën: “Pse njeriu më i urryer në botë është ende gjallë?”.
“Pse të mos e vrasim atë që vrau Imamin dhe Udhëheqësin tim? Është turp për ne nëse nuk e vrasim vrasësin tuaj”, tha ai, duke marrë duartrokitje nga të pranishmit, raporton Euronews, transmeton Sinjali. Në ceremoninë e mbajtur në Teheran u panë gjithashtu postera dhe slogane që mbështesnin idenë e vrasjes së Trumpit dhe Netanyahut.
Rasouli u bëri thirrje pjesëmarrësve të brohorisnin “Vdekje Amerikës” dhe “Vdekje Izraelit”. Sipas raportimeve, në funeral ishte ngritur edhe një flamur i kuq me mbishkrimin “Ya Litharat al-Hussein” (“O hakmarrësit e Huseinit”), simbol që në traditën shiite lidhet me kërkimin e hakmarrjes për vrasjen e Husein ibn Aliut, Imamit të tretë të Islamit shiit.
Deklaratat vijnë në një kohë kur vazhdojnë negociatat mes Uashingtonit dhe Teheranit për t’i dhënë fund luftës mes dy vendeve. Nga ana tjetër, Trump kishte deklaruar në janar se kishte dhënë “udhëzime shumë të forta” që Irani të “fshihej nga faqja e dheut” nëse do të tentonte ta vriste atë.
Presidenti amerikan, duke folur në Mount Rushmore, tha se SHBA-ja e kishte “goditur rëndë Iranin” dhe se Teherani “po kërkon me ngulm një marrëveshje”. Në një intervistë për Axios, Trump tha gjithashtu se po e ndiqte nga afër funeralin e Khameneit. “Ata janë të gjithë atje.
Një goditje dhe mund t’i eliminojmë të gjithë, por nuk do ta bëjmë këtë, sepse atëherë nuk do të kishim me kë të negocionim”, u shpreh ai. Sinjali – aty ku e vërteta flet para lajmit!