Pas tërmeteve të fuqishme që goditën Venezuelën, në disa qytete janë raportuar plaçkitje masive të dyqaneve dhe bizneseve, duke shtuar kaosin në një situatë tashmë të rëndë humanitare.
Sipas mediave lokale, grupe personash kanë përfituar nga dëmet e shkaktuara nga lëkundjet sizmike për të hyrë në objektet tregtare dhe për të marrë mallra të ndryshme, përfshirë ushqime dhe pajisje elektronike. Në disa zona janë raportuar edhe përplasje mes autorëve të grabitjeve dhe forcave të sigurisë.
Tërmetet me magnitudë 7.2 dhe 7.5 kanë shkaktuar dëme të mëdha në infrastrukturë dhe ndërtesa, ndërsa autoritetet raportojnë qindra të plagosur dhe dhjetëra viktima, me frikë se bilanci mund të rritet më tej. Qeveria ka shpallur gjendje të jashtëzakonshme dhe ka angazhuar forca shtesë policore dhe ushtarake për të parandaluar përshkallëzimin e situatës dhe për të garantuar rendin publik.
Ndërkohë, ekipet e emergjencës po vazhdojnë kërkimet për të mbijetuar nën rrënoja, ndërsa shumë zona mbeten pa energji elektrike dhe furnizime bazike. Autoritetet u kanë bërë thirrje qytetarëve të ruajnë qetësinë dhe të mos përfshihen në akte dhune apo grabitjeje, në një kohë kur vendi po përballet me një krizë të thellë pas fatkeqësisë natyrore.
Sinjali – aty ku e vërteta flet para lajmit!