Pasagjerët që udhëtojnë me Qatar Airways nga Aeroporti Ndërkombëtar Hamad në Doha tashmë mund të kalojnë procedurat e nisjes duke përdorur vetëm njohjen e fytyrës, pa pasur nevojë të paraqesin pasaportën apo dokumente të tjera në pikat kryesore të kontrollit.
Shërbimi i ri biometrik, i quajtur “Fast Pass”, është zhvilluar nga Aeroporti Ndërkombëtar Hamad dhe Qatar Airways, në bashkëpunim me kompaninë teknologjike SITA. Sistemi përdor teknologjinë e njohjes së fytyrës për të mundësuar një proces udhëtimi më të shpejtë dhe pothuajse plotësisht pa dokumente, raporton Euronews, përcjell Sinjali.
Sipas aeroportit, projekti përfshin më shumë se 700 pika kontrolli dhe konsiderohet një nga zbatimet më të mëdha të teknologjisë biometrike për pasagjerët në Lindjen e Mesme dhe në nivel global.
Autoritetet kanë bërë të ditur se sistemi do të zgjerohet edhe në pika të tjera të aeroportit, ndërsa në të ardhmen pritet të jetë i disponueshëm edhe për linja të tjera ajrore që operojnë nga Doha. Ndërkohë, Shoqata Ndërkombëtare e Transportit Ajror (IATA) thotë se përdorimi i teknologjisë biometrike në aeroporte po rritet vazhdimisht.
Sipas Anketës Globale të Pasagjerëve për vitin 2025, 50 për qind e udhëtarëve kanë përdorur tashmë sisteme biometrike gjatë udhëtimit, ndërsa 85 për qind janë shprehur të kënaqur me këtë përvojë. Sinjali – aty ku e vërteta flet para lajmit!