Vita Abrashi-Kajtazi Shpërndaje në: Nëse dëshironi të rrisni marrjen e fibrave dhe të kujdeseni për shëndetin e zemrës dhe tretjes, dietologët rekomandojnë një mëngjes të thjeshtë: tërshërë të përgatitur një natë më parë me fara chia, ka shkruar EatingWell.
Dieta mesdhetare, e pasur me perime, fruta, drithëra të plota, bishtajore, arra, fara, vaj ulliri dhe peshk, konsiderohet një nga mënyrat më të shëndetshme të të ushqyerit. Një nga arsyet kryesore është përmbajtja e lartë e fibrave, të cilat ushqejnë bakteret e dobishme të zorrëve dhe ndihmojnë në mbrojtjen e organizmit nga sëmundjet.
Sipas dietologëve, kombinimi i tërshërës, farave chia, qumështit të bajames, kosit të trashë, pjeshkave dhe arroreve siguron rreth 11 gramë fibra dhe 12 gramë proteina në një porcion, ose afërsisht një të tretën e sasisë ditore të fibrave që i nevojitet shumicës së njerëzve. Pse rekomandohet ky mëngjes?
Mbështet shëndetin e zorrëve “Ky kombinim ndihmon tretjen, rrit ndjenjën e ngopjes dhe siguron energji të qëndrueshme gjatë gjithë paradites”, ka shpjeguar dietologia Sheila Patterson. Fibrat nga tërshëra, farat chia, pjeshkët dhe arrat ushqejnë bakteret e dobishme të zorrëve dhe ndihmojnë në uljen e inflamacionit.
Mbron zemrën “Fibrat e tretshme lidhen me nivelin e yndyrës së dëmshme në gjak, apo kolesterolit, dhe ndihmojnë në largimin e tij nga organizmi, duke ulur kolesterolin (LDL) dhe trigliceridet”, ka thënë dietologia Val Warner. Një dietë e pasur me fibra lidhet gjithashtu me presion më të shëndetshëm të gjakut, rrezik më të ulët për sëmundjet e zemrës dhe kontroll më të mirë të peshës.
Mban nën kontroll sheqerin në gjak Kombinimi i fibrave, proteinave dhe yndyrave të shëndetshme ngadalëson tretjen dhe përthithjen e sheqerit. “Fibrat, proteinat dhe yndyrat e shëndetshme janë kombinimi ideal për të mbajtur të qëndrueshme nivelet e sheqerit në gjak dhe për të shmangur rënien e energjisë gjatë mëngjesit”, ka thënë Warner.
“Shtimi i fibrave në vakte ndihmon organizmin t’i përgjigjet më mirë insulinës, rrit ngopjen dhe zvogëlon rrezikun e ngrënies së tepërt”, ka thënë Briana Reamer.
Alternativa të tjera të pasura me fibra Nëse nuk preferoni tërshërën e përgatitur një natë më parë, dietologët sugjerojnë edhe: kos grek me djathë rikota, manaferra, fara chia dhe bajame, bukë integrale me avokado, gjizë me perime dhe qiqra të pjekura, tas me drithëra të plota, vezë, avokado dhe perime, lëng të përgatitur vetë në shtëpi me spinaq, banane, mango dhe ananas, të pasur me kos grek ose pluhur proteinik.
Këshilla e ekspertëve Ekspertët rekomandojnë që marrja e fibrave të rritet gradualisht dhe të shoqërohet gjithmonë me konsum të mjaftueshëm uji. Mëngjesi i pasur me fibra, proteina dhe yndyra të shëndetshme jo vetëm që përmirëson tretjen dhe shëndetin e zemrës, por ju mban të ngopur për më gjatë dhe ndihmon në stabilizimin e nivelit të sheqerit në gjak gjatë gjithë ditës.