Komuna e Mitrovicës ka deklaruar se po vazhdon me intervenimet për mirëmbajtjen e Liqenit Akumulues, duke mohuar se ekziston ndonjë kontratë në vlerë prej 600 mijë eurosh vetëm për këtë hapësirë.
Në një përgjigje për KosovaPress, drejtori për Shërbime Publike dhe Infrastrukturë, Naser Muja, ka thënë se komuna është në monitorim të vazhdueshëm të gjendjes së liqenit dhe investimeve në këtë zonë. Sipas tij, gjendja aktuale e Liqenit Akumulues është trashëguar, ndërsa menaxhimi i saj paraqet sfidë për institucionin komunal.
“Komuna e Mitrovicës, në vazhdimësi, jo vetëm për Liqenin e Mitrovicës, por për të gjitha investimet që janë në territorin e Mitrovicës, është në monitorim të vazhdueshëm për mbarëvajtjen e punimeve dhe mirëmbajtjen e tyre.
Këtë gjendje aktuale e kemi trashëguar dhe nuk është aspak e lehtë për t’u menaxhuar, por jemi duke bërë përpjekje të vazhdueshme për mirëmbajtjen e saj”, ka thënë Muja. Duke folur për kontratat e mirëmbajtjes, Muja ka sqaruar se nuk ka një kontratë me vlerë prej 600 mijë eurosh për Liqenin Akumulues.
Ai ka bërë të ditur se kontrata ekzistuese është ajo me emërtimin “Mirëmbajtja verore e rrugëve në qytet, periferi dhe Liqenin Akumulues”, me vlerë totale prej 900 mijë eurosh. Sipas tij, kjo kontratë përfshin disa kategori dhe pozicione të punëve, ndërsa për mirëmbajtjen e liqenit është paraparë një shumë prej 45 mijë eurosh.
“Ky pozicion për mirëmbajtjen e liqenit gjendet në Kategorinë 3, ndërsa vlera e saj për këtë pozicion është 45,000 euro”, ka deklaruar drejtori Muja. Ai ka bërë të ditur se kontrata është duke u zbatuar dhe monitoruar nga Drejtoria për Shërbime Publike dhe Infrastrukturë, por ende nuk është përmbushur plotësisht.
Muja ka deklaruar se komuna intervenon pothuajse çdo ditë në hapësirat e Liqenit Akumulues, përfshirë mirëmbajtjen e gjelbërimit, portave të liqenit dhe kositjen e barishteve. Sipas tij, pajisja për kositjen e liqenit, e cila ishte gjetur e dëmtuar, është riparuar dhe tashmë është funksionale për mirëmbajtjen e vazhdueshme të kësaj zone.
Komuna e Mitrovicës ka bërë të ditur se përveç mirëmbajtjes aktuale, po shqyrton edhe investime të reja për përmirësimin e infrastrukturës së liqenit. “Jemi duke menduar për përmirësimin e infrastrukturës së mëtejshme, duke instaluar edhe sistemin e ujitjes në vitet në vijim”, ka thënë Muja.
Liqeni Akumulues në Mitrovicë vazhdimisht ka qenë në fokus të qytetarëve për shkak të gjendjes së hapësirave përreth tij, mirëmbajtjes së gjelbërimit dhe nevojës për investime shtesë. Liqeni artificial në Mitrovicë konsiderohet të jetë një nga bukuritë kryesore të pjesës së afërt urbane të këtij qytetit.
Prejse u bë ai, rreth një dekadë më parë, mitrovicasit, pos që krenoheshin me të, edhe kalonin shumë kohë të kjo hapësirë e komunës që ndodhet afër stadiumit Adem Jashari.