Jordan Henderson e ka përshkruar me humor aksidentin e pazakontë që i shkaktoi thyerjen e krahut si “jo momentin tim më të mirë”, pasi iu bashkua sërish kampit të Anglisë në Kupën e Botës 2026. Mesfushori veteran u lëndua në rrethana të çuditshme gjatë festimeve pas fitores dramatike 3-2 të Anglisë ndaj Meksikës në fazën e 1/8 së finales.
Edhe pse nuk u aktivizua në fushë në atë ndeshje, futbollisti i Brentfordit arriti të merrte një karton të verdhë dhe të pësonte një dëmtim serioz, pasi u rrëzua mbi tabelat reklamuese gjatë festës me tifozët anglezë. Goditja ishte aq e rëndë sa 36-vjeçari u largua nga stadiumi “Azteca” me barelë, ndërsa po merrte oksigjen.
Henderson është rikthyer tashmë në kampin e Anglisë me një allçi mbrojtëse në krah dhe u pa duke marrë pjesë në nxehjen para çerekfinales kundër Norvegjisë. Duke folur për “ITV”, ai tha: “Jam mirë, faleminderit. Nuk ishte momenti im më i mirë, por gjëja më e rëndësishme ishte të fitonim ndeshjen dhe të kualifikoheshim në çerekfinale.
Ia dolëm dhe kjo ka më shumë rëndësi.” “Këto kanë qenë disa ditë të vështira, por sapo u ktheva në kamp dhe pashë djemtë, u ndjeva më mirë. Kemi një ekip mjekësor fantastik dhe jam shumë mirënjohës për këtë”, shtoi ai. Ish-kapiteni i Liverpoolit iu nënshtrua një operacioni në Mexico City për të riparuar frakturën, përpara se të rikthehej në kampin e Anglisë.
Lëndimi shkaktoi shqetësim të madh edhe te familja e tij, veçanërisht te babai, Brian Henderson, i cili kaloi një natë pa gjumë duke pritur lajme për gjendjen e të birit. “Edhe mjekët dhe kirurgët në Kansas ishin të jashtëzakonshëm. U jam shumë mirënjohës dhe jam shumë i lumtur që jam sërish pjesë e skuadrës sot,” u shpreh Henderson.
Deri tani, ai ka luajtur vetëm 12 minuta në këtë Kupë Bote, në fitoren 2-0 ndaj Panamasë në fazën e grupeve, por trajneri Thomas Tuchel ka vendosur ta mbajë pranë ekipit për shkak të përvojës dhe rolit të tij në grup. Pavarësisht seriozitetit të dëmtimit, Henderson nuk e ka përjashtuar mundësinë e rikthimit në fus hë para përfundimit të turneut.
“Do ta shohim kur të vijë momenti,” tha ai, duke lënë të kuptohet se ende shpreson të rikuperohet në kohë. Vendosmëria e tij për të qëndruar pranë “Tre Luanëve” është konfirmuar edhe nga familja, e cila ka bërë të ditur se ai nuk ka ndërmend të largohet para kohe nga kampi i kombëtares.
Mesfushori vazhdon të jetë i pranishëm në seancat stërvitore, duke mbështetur shokët e skuadrës nga jashtë fushës me krahun e fashuar..