Fenerbahçe është në prag të sigurimit të shërbimeve të Mason Greenwoodit, pasi ka arritur një marrëveshje me Olympique Marseillen për transferimin e sulmuesit anglez, sipas raportimeve të mediave në Turqi. Gazetari Yagız Sabuncuoglu bën të ditur se të dy klubet kanë mbyllur negociatat dhe janë pajtuar për të gjitha kushtet e transferimit, që pritet të kushtojë rreth 40 milionë funte.
Pas disa javësh bisedimesh mes palëve, marrëveshja duket se ka hyrë në fazën përfundimtare, duke e afruar gjithnjë e më shumë Greenwoodin me një kalim te gjiganti nga Stambolli. Edhe mediat franceze raportojnë se procedurat janë pothuajse të përfunduara dhe se 24-vjeçari pritet të bëhet së shpejti pjesë e Fenerbahçes.
Nëse transferimi zyrtarizohet, ai do të renditet ndër blerjet më të kushtueshme në historinë e klubit turk dhe do të konsiderohet një përforcim i rëndësishëm për sulmin në prag të sezonit të ri. Përfitim nga kjo marrëveshje do të ketë edhe Manchester Unitedi.
Klubi anglez ka ruajtur një përqindje nga shitja e ardhshme e Greenwoodit, sipas klauzolës së vendosur kur lojtari u transferua te Marseille në vitin 2024. Greenwood iu bashkua klubit francez gjatë verës së vitit 2024 dhe pati një periudhë mjaft të suksesshme në Ligue 1. Në 81 ndeshje me fanellën e Marseilles, ai shënoi 48 gola dhe kontribuoi me 17 asistime.
Sinjali – aty ku e vërteta flet para lajmit!