Edicioni i katërt i Rock & Blues Fest ka hapur dyert këtë mbrëmje për adhuruesit e muzikës në Prizren. Festivali, i cili do të mbahet nga 3 deri më 5 korrik, do ta shndërrojë qytetin në qendër të ritmeve rock për tri net me radhë. Në festival do të performojnë rreth 15 grupe nga Shqipëria, Kosova, Turqia dhe vende të tjera.
Në program përfshihen rikthimi në skenë i grupit Telex pas një pauze të gjatë, grupi me famë botërore Dire Straits Legacy, grupet turke Kolpa dhe Doludizgin Band, Guns N’ Roses Tribute nga Italia, si dhe grupi kosovar Dhjetori.
Për festivalin është ndërtuar një nga skenat më të mëdha të koncerteve në Kosovë, në hapësirën përballë Qendrës Sportive, ndërsa është përgatitur edhe një skenë e dytë për promovimin e grupeve të reja. Në natën hapëse të festivalit performuan 3 Musketjerët, Attitude Gnr Band, TNT, Rool dhe Zwada Band.
Organizatorët njoftuan se në natën e dytë, më 4 korrik, në skenë do të ngjiten edhe grupet turke Kolpa dhe Doludizgin Band. Festivali është falas për publikun dhe ka mbledhur një numër të madh adhuruesish të muzikës nga vendi dhe jashtë tij. Organizatorët theksojnë se Prizreni do të jetë qendra e muzikës rock për tri ditë me radhë.