Pas fitores 2-1 ndaj Kongos të mërkurën, Thomas Tuchel dhe skuadra e Anglisë u kthyen në bazën e tyre në Kansas City. Duket se ata e morën këtë vendim, në vend që të bënin një fluturim direkt nga Atlanta drejt Meksikës, për disa arsye, njëra prej të cilave ishte për të parandaluar kundërshtarët që të spiunonin seancat e tyre stërvitore.
Një raport i “Mail” sugjeron se Tuchel është i vendosur që planet e tij të mos rrjedhin para ndeshjes dhe që përgatitjet e rëndësishme, si formacioni dhe skema e skuadrës, të mbahen brenda bazës kryesore. Thuhet se seancat në Kansas ruhen nga policia dhe roje sigurie, ndërsa rreziku i spiunimit shihet brenda kampit si më i lartë nëse Anglia do të kishte udhëtuar më herët në Meksikë.
Sigurisht, kjo sjell edhe disavantazhe, pasi i jep skuadrës më pak kohë për t’u përshtatur me lartësinë e madhe, gjë që është përmendur edhe nga tifozët e trajneri. Një tifoz komentoi: “Epo, atëherë më mirë të mos vonohemi shumë. Ajri në Meksikë është më i hollë dhe duhet përshtatje para ndeshjes”. Një tjetër shkroi: “Po 2.200 metra mbi nivelin e detit?
A do t’ju duhet kohë për t’u përshtatur?” Një i tretë shtoi: “Mos u shqetësoni për formën, ne nuk kemi formë. Unë do të shqetësohesha më shumë për lartësinë”. Stadiumi “Estadio Azteca” ndodhet në më shumë se 7.000 metra mbi nivelin e detit, rreth një herë e gjysmë më lart se maja e Ben Nevis, pika më e lartë në Mbretërinë e Bashkuar.
Megjithatë, Tuchel beson se është e pamundur të përshtatesh me lartësinë në një periudhë kaq të shkurtër. “Ndeshja kundër Meksikës në ‘Azteca’ do të ketë shumë, shumë, shumë pengesa që na presin, – tha ai. – Pa përmendur lartësinë, e cila do të jetë sigurisht një disavantazh i madh, sepse ne nuk mund të përshtatemi fizikisht në katër ditë.
Është thjesht e pamundur, pastaj mund të shfaqen edhe pengesa të tjera”. Gjatë Kupës së Botës këtë verë, tifozët e Meksikës kanë qenë “lojtari i 12-të” për ekipin. Në fakt, roli i tyre është shtrirë edhe në aktivitetet para ndeshjeve.
Tifozët e “El Tri” kanë prishur përgatitjet e kundërshtarëve, deri në pikën që Federata e Futbollit të Ekuadorit bëri një ankesë zyrtare për ata që u mblodhën jashtë hotelit të tyre dhe tentuan t’i mbanin zgjuar. Tani, tifozët meksikanë po planifikojnë të përsërisin sjelljet e tyre tradicionale kundër Anglisë, sipas “The Mirror”.
Thuhet se ata po planifikojnë të sjellin altoparlantë, makina, muzikë, motoçikleta dhe borie për të krijuar zhurmë shurdhuese jashtë hotelit ku po qëndron Anglia dhe, megjithëse policia lokale do të jetë e pranishme, ata mund ta kenë vështirësi për ta kontrolluar situatën.