Anglia po përballet me probleme të reja fizike vetëm pak ditë para çerekfinales së Kupës së Botës kundër Norvegjisë. Marc Guehi pritet të jetë në dyshim serioz, ndërsa Declan Rice ka munguar në stërvitje për shkak të një viroze.
Pas fitores së vështirë 3-2 ndaj Meksikës të dielën, Anglia po përgatitet për përballjen e madhe me Norvegjinë e Erling Haalandit, që do të zhvillohet të shtunën në Miami. Futbollistët anglezë shpenzuan shumë energji në triumfin historik në stadiumin “Azteca”, ndërsa Thomas Tuchel tani duhet të përballet me një tjetër shqetësim serioz para ndeshjes në “Hard Rock Stadium”.
Guehi me dëmtim në kofshë Sipas gazetarit të BBC-së, Sami Mokbel, qendërmbrojtësi Marc Guehi ka pësuar një problem në pjesën e pasme të kofshës dhe mund të mungojë ndaj Norvegjisë. Guehi luajti gjatë gjithë ndeshjes kundër Meksikës, duke kompletuar 90 minuta për herë të katërt në këtë turne. Në ndeshjen hapëse ndaj Kroacisë ai ishte aktivizuar vetëm për pak minuta.
Mbrojtësi raportohet se ka pësuar një tërheqje të lehtë muskulore. Fillimisht, ai u vendos në një program individual stërvitor, pasi besohej se bëhej fjalë vetëm për lodhje muskulore. Dëmtimi nuk konsiderohet i rëndë, por Guehi do t’u nënshtrohet kontrolleve të reja të premten. Nëse mungon edhe në stërvitjen e fundit, gjasat që të luajë ndaj Norvegjisë do të zvogëlohen ndjeshëm.
Mbrojtësi i Manchester Cityt shpreson të rikuperohet në kohë për t’u përballur me bashkëlojtarin e tij në klub, Erling Haaland, i cili ka realizuar shtatë gola në këtë Kupë Bote. Nëse Guehi nuk ia del, John Stones, Dan Burn dhe Nathaniel Chalobah janë alternativat për të luajtur përkrah Ezri Konsas në qendër të mbrojtjes.
Rice mungon në stërvitje Një tjetër shqetësim për Anglinë është gjendja e Declan Rice. Mesfushori i Arsenalit ka munguar në dy ditët e fundit të stërvitjeve për shkak të një viroze. Stafi mjekësor po përpiqet ta izolojë sëmundjen, në mënyrë që ajo të mos përhapet te pjesa tjetër e skuadrës. Problemet fizike të Rice me kofshën dhe pjesën e poshtme të shpinës janë dokumentuar prej kohësh.
Vetë futbollisti kishte pranuar se vuante nga dhimbje nervore pas një sezoni shumë të ngarkuar dhe të suksesshëm në nivel klubesh. Ai mungoi në fitoren e fazës së grupeve ndaj Panamasë, por u rikthye në formacionin titullar për të dyja ndeshjet e fazës së eliminimit direkt. Rice mbetet një nga lojtarët më të rëndësishëm në sistemin e Thomas Tuchelit.
Reece James rikthehet me ekipin Lajmi pozitiv për Anglinë është rikthimi i Reece Jamesit në stërvitje të plotë. Mbrojtësi nuk është paraqitur që nga dëmtimi në kofshë, të pësuar gjatë barazimit 0-0 ndaj Ganës. Për këtë arsye, ai kishte munguar edhe në seancat e plota stërvitore. James u rikthye me grupin kryesor të enjten.
Edhe pse nuk e përfundoi të gjithë seancën, sipas BBC-së ai pritet të jetë në dispozicion për ndeshjen me Norvegjinë. Rikthimi i tij vjen në një moment të rëndësishëm, pasi Anglia ka pasur shumë probleme në pozitën e mbrojtësit të djathtë.
Tino Livramento është larguar nga turneu dhe i është nënshtruar një ndërhyrjeje kirurgjikale për një dëmtim në pulpë, ndërsa Djed Spence ka qenë i vetmi mbrojtës i djathtë plotësisht i gatshëm gjatë gjithë garës. Quansah dënohet me dy ndeshje Jarell Quansah ishte përdorur si zëvendësues në atë pozitë në dy ndeshje, por u ndëshkua me karton të kuq ndaj Meksikës pas ndërhyrjes së VAR-it.
FIFA ka konfirmuar se mbrojtësi është pezulluar për dy ndeshje dhe vendimi nuk mund të apelohet. Kjo do të thotë se Quansah do të mungojë në çerekfinalen ndaj Norvegjisë dhe, nëse Anglia kualifikohet, edhe në gjysmëfinale.
Problemet me Guehin, gjendja e Rice dhe pezullimi i Quansah e komplikojnë ndjeshëm përgatitjen e Tuchelit për duelin me Norvegjinë, ku ndalimi i Haalandit pritet të jetë sfida kryesore e mbrojtjes angleze.