Trajneri i Brazilit, Carlo Ancelotti, ka pranuar se Neymar nuk është i kënaqur me minutazhin e tij në Kupën e Botës 2026, por ka theksuar se sulmuesi po e menaxhon situatën në mënyrë profesionale dhe po mbetet një figurë pozitive brenda skuadrës.
Ylli brazilian, golashënuesi më i mirë në historinë e kombëtares, ka luajtur vetëm 14 minuta në turne deri tani, duke u aktivizuar si zëvendësues në fitoren 3-0 ndaj Skocisë në fazën e grupeve. 34-vjeçari pritet sërish të nisë nga stoli në sfidën e 1/8 së finales kundër Norvegjisë, e cila zhvillohet të dielën në stadiumin “MetLife”. “Nuk është i kënaqur, por po sillet shumë mirë.
Po stërvitet mirë. Neymar është shumë i respektueshëm, i sjellshëm dhe i dashur nga shokët e skuadrës,” deklaroi Ancelotti për gazetën braziliane “Folha de S.Paulo”, transmeton RTKLive. Ai shtoi se Neymar mbetet një element i rëndësishëm i ekipit, pavarësisht rolit aktual. “Është një lojtar me cilësi të madhe dhe një person shumë i përulur. Jam shumë i kënaqur me të.
Natyrisht, ai dëshiron të luajë, si gjithmonë,” u shpreh trajneri italian. Ancelotti konfirmoi gjithashtu se Neymar është tashmë i gatshëm për të luajtur një ndeshje të plotë, duke hedhur poshtë dyshimet për gjendjen e tij fizike pas dëmtimit në pulpë para turneut. “E rëndësishme është që ai mund të luajë. Sa do të luajë, varet nga situata e ndeshjes.
Ai ka përvojën për të menaxhuar ritmin. Kur skuadra të ketë nevojë për të, do ta aktivizoj,” tha Ancelotti. Brazilit i pret një sfidë e vështirë ndaj Norvegjisë, një kundërshtar ndaj të cilit nuk ka fituar kurrë në histori (dy barazime dhe dy humbje). Gjithashtu, brazilianët nuk kanë mposhtur një skuadër evropiane në fazën me eliminim direkt të Kupës së Botës që nga viti 2002.
“Do të jetë gjithmonë e vështirë, por jemi të sigurt se do të bëjmë një ndeshje të mirë. Ata janë shumë të organizuar në mbrojtje dhe trajneri i tyre po bën një punë të shkëlqyer,” shtoi Ancelotti. Ai përfundoi duke theksuar se Brazili është i përgatitur për çdo skenar të mundshëm të ndeshjes.