“Realiste aspirata për anëtarësim në BE më 2027”, Parlamenti Evropian miraton rezolutën për Shqipërinë

Parlamenti Europian ka miratuar të mërkurën rezolutën për Shqipërinë. Në këtë dokument vlerësohet angazhimi i shtetit shqiptar në integrimin në BE dhe ambicien e Tiranës për të mbyllur negociatat e pranimit deri në fund të vitit 2027. Në raport theksohet shqetësimi për polarizimin e vazhdueshëm politik dhe diskursin politik konfrontues, të cilat sipas raportit, dëmtojnë mbikëqyrjen parlamentare, besimin publik dhe funksionimin efektiv të institucioneve demokratik. “1. Përshëndet angazhimin e jashtëzakonshëm të Shqipërisë ndaj integrimit në BE, bazuar në konsensus midis të gjitha partive të saj politike dhe mbështetje dërrmuese midis qytetarëve të saj, dhe përgëzon faktin që Shqipëria hapi të gjitha grupet për negociatat e pranimit brenda vetëm 13 muajsh; vëren se mbështetja e qytetarëve shqiptarë për anëtarësim në BE mbetet vazhdimisht e lartë dhe pasqyron aspiratat e forta evropiane të shoqërisë shqiptare; inkurajon vendin të ruajë vrullin aktual të reformave dhe të vazhdojë përafrimin e saj me acquis të BE-së , duke theksuar se përparimi i Shqipërisë në rrugën e saj evropiane kontribuon në stabilitetin, sigurinë dhe qëndrueshmërinë e kontinentit evropian.” Në pikën e dytë merret parasysh ambicia e Shqipërisë për të mbyllur negociatat e pranimit deri në fund të vitit 2027 dhe mirëpret progresin e shpejtë të bërë vitet e fundit në këtë drejtim, duke theksuar nevojën që autoritetet shqiptare të sigurojnë zbatimin e plotë të legjislacionit. Derisa, në pikën e tretë flet për zgjedhjet e vitit 2025 dhe akuzat për këtë proces, në pikën e katërt shprehet shqetësimi për polarizimin e vazhdueshëm politik dhe diskursin politik konfrontues. Gjithashtu, raporti inkurajon një kontroll më të fortë parlamentar të ekzekutivit, transparencë të shtuar në procedurat legjislative dhe konsultime më kuptimplote, në një fazë të hershme, me organizatat e shoqërisë civile, partnerët socialë dhe institucionet e pavarura. “Thekson se progresi në procesin e integrimit në BE duhet të ndiqet pa bërë kompromis me cilësinë dhe përfshirjen e reformave; nënvizon rëndësinë e angazhimit adekuat të palëve të interesuara dhe pronësisë kombëtare në mënyrë që të sigurohet zbatim i qëndrueshëm dhe ndikim i qëndrueshëm; thekson rëndësinë e forcimit të rolit dhe kapaciteteve të komisioneve parlamentare të Shqipërisë, duke përfshirë edhe përmes aksesit të përmirësuar në informacion, mbështetjes së ekspertëve dhe procedurave transparente legjislative”, thuhet veç të tjerash në rezolutë.