Pas suksesit të arritur së fundmi në arenën ndërkombëtare, Ministri i Sportit dhe Rinisë, Blerim Gashani, ka pritur në takim atleten e suksesshme kosovare, Gresa Bakraqi, për ta uruar për rezultatet e arritura. Gresa Bakraqi vazhdon të konfirmohet si një nga figurat më të spikatura të atletikës kosovare.
Në Kampionatin Evropian të Shteteve në Zhvillim, të mbajtur në Monako, ajo fitoi medaljen e argjendtë, ndërsa në Kampionatin Ballkanik në Volos të Greqisë u stolis me dy medalje të argjendta, duke shënuar një tjetër sukses të madh për sportin e Kosovës. Në Kampionatin Evropian të Shteteve në zhvillim në Monako, ajo u shpall nënkampione, duke konfirmuar nivelin e saj elitar në atletikë.
Në Kampionatin Ballkanik në Volos, ajo fitoi dy herë titullin nënkampione ballkanike dhe vendosi rekord shtetëror në 5000 metra, duke e bërë këtë paraqitje, një nga më të veçantat e saj. Ndërsa në “Challenge Meeting” në Celje, Slloveni, u shpall kampione dhe theu edhe një herë rekordin shtetëror në 1 milje.
Në këtë takim u vlerësuan rezultatet, përkushtimi dhe puna e vazhdueshme e atletes, e cila me paraqitjen e saj po e prezanton Kosovën me dinjitet në garat më të rëndësishme ndërkombëtare. Kjo është medalja e saj e tetë ballkanike në kategorinë seniore.