Një anije peshkimi e regjistruar në Francë është fundosur në Kanalin e La Manshit, duke lënë dy persona të zhdukur, ndërsa tre të tjerë janë shpëtuar dhe dërguar në spital. Alarmi u dha pak pas orës të së shtunës, pasi autoritetet morën një raport se anija, me pesë persona në bord, ndodhej në vështirësi në brigjet e Plymouth, në Devon.
Menjëherë u aktivizua një operacion i gjerë kërkim-shpëtimi. Në zonë u dërguan një helikopter i Rojës Bregdetare, një avion dhe varka shpëtimi të RNLI-së nga Falmouth dhe Plymouth. Anija besohet se kishte pësuar probleme në jugperëndim të farit Eddystone, i cili ndodhet rreth 24 kilometra në jug të Plymouth. Tre persona u nxorën nga deti dhe u transportuan në spital për kujdes mjekësor.
Ndërkohë, ekipet e shpëtimit vijojnë kërkimet për dy personat e tjerë, të cilët ende rezultojnë të zhdukur. Roja Bregdetare britanike bëri të ditur se operacioni intensiv i kërkimit vazhdoi gjatë gjithë natës dhe po vijon edhe të dielën, me disa mjete të angazhuara në zonë.
Autoritetet konfirmuan se anija tashmë është fundosur, ndërsa shkaqet që çuan në incident nuk janë bërë ende të ditura.