Katër persona kanë humbur jetën pasditen e së mërkurës, më 26 gusht, pasi një avion i vogël charter u rrëzua në Seldovia Slough, në Alaska, dhe përfundoi nën sipërfaqen e ujit pranë aeroportit të komunitetit. Avioni, një Piper PA-24 Comanche, ishte nisur nga Aeroporti Merrill Field në Anchorage me destinacion Seldovia, por nuk arriti të mbërrinte në destinacion.
Pas raportimit të incidentit, në operacionin e kërkim-shpëtimit u angazhuan pjesëtarë të Policisë, Shërbimit të Konservimit të Jetës së Egër të Alaskës, si dhe një helikopter i Departamentit të Sigurisë Publike, i cili u nis nga Anchorage.
Sipas Clint Johnson, drejtues i zyrës rajonale të Alaskës të Bordit Kombëtar të Sigurisë së Transportit (NTSB), avioni ndodhej rreth 4.5 metra nën ujë, pranë bregut të Seldovia Slough. Kushtet e ujit dhe ndryshimi i baticës penguan ekipet e shpëtimit që të ndërhynin menjëherë.
Për këtë arsye, ekipet u detyruan të prisnin disa orë, deri në rënien e nivelit të ujit dhe krijimin e kushteve të përshtatshme për ndërhyrje. “Rreth orës , ekipet e shpëtimit nxorën nga avioni trupat e katër të rriturve”, njoftoi Departamenti i Sigurisë Publike të Alaskës. Trupat e viktimave janë transportuar në Zyrën e Mjekut Ligjor Shtetëror të Alaskës, ku pritet t’u kryhen autopsitë.
Identitetet e viktimave ende nuk janë bërë publike, pasi autoritetet fillimisht duhet t’i konfirmojnë ato dhe të njoftojnë familjarët. Ndërkohë, shkaqet dhe rrethanat e rrëzimit të avionit janë nën hetim. Sinjali – aty ku e vërteta flet para lajmit!