Dy punonjës të Aeroportit të Frankfurtit kanë vdekur nga malaria, pasi një shpërthim i rrallë i sëmundjes ka bërë që gjashtë punonjës të infektohen me këtë sëmundje serioze që përhapet përmes mushkonjave.
Besohet se mushkonjat kanë mbërritur në aeroportin më të madh të Gjermanisë me një avion, sipas zyrtarëve gjermanë të shëndetësisë, duke shkaktuar një shpërthim që u zbulua për herë të parë në korrik.
Një zëdhënës i operatorit të aeroportit, Fraport, i tha BBC -së se një punonjës kishte vdekur si pasojë e infeksionit, ndërsa zyrtarët e shëndetësisë konfirmuan më vonë të mërkurën se dy prej personave të prekur kishin vdekur. Në aeroport janë vendosur kurthe për mushkonjat, të cilat do të analizohen në laborator për të përcaktuar llojin dhe origjinën e tyre.
“Ne u kemi ofruar të gjithë punonjësve informacione të plota dhe i kemi inkurajuar që të konsultohen me një mjek nëse shfaqin ndonjë simptomë”, tha zëdhënësi i Fraport për BBC-në. Shpërthimi po hetohet nga Departamenti i Shëndetit Publik të Frankfurtit.
Sipas informacioneve të BBC-së, gjashtë punonjës meshkuj të aeroportit, të angazhuar në pozita të ndryshme dhe në zona të ndryshme të aeroportit, janë infektuar. Autoritetet po analizojnë mostrat e gjakut për të përcaktuar nëse infeksioni është shkaktuar nga një mushkonjë e vetme apo nga gjashtë mushkonja të ndryshme. Sinjali – aty ku e vërteta flet para lajmit!