Zyra Kombëtare e Auditimit (ZKA) ka publikuar raportin e auditimit të performancës, “Efektiviteti në përdorimin e kriterit ‘tenderi ekonomikisht më i favorshëm’ për dhënie të kontratës në prokurim publik”, i cili ka vlerësuar aktivitetet e prokurimit të Ministrisë së Infrastrukturës si dhe ato të Komunës së Pejës dhe të Suharekës për periudhën 2023-2025.
Nga rezultatet e këtij auditimi ka dalë se përdorimi i kriterit “Tenderi ekonomikisht më i favorshëm”, nuk ka qenë efektiv dhe nuk ka sjellë ndryshime pozitive në rezultatet e prokurimit publik. “Ministria dhe komunat e audituara e kanë përdorur këtë kriter kryesisht në mënyrë formale, pa analiza dhe arsyetime të mjaftueshme dhe pa vlerësuar efektet e tij.
Nga gjashtë aktivitetet e prokurimit të audituara, tri ishin zhvilluar me kriterin “Tenderi ekonomikisht më i favorshëm”, ndërsa tri me kriterin “çmimi më i ulët”- thuhet në njoftimin e ZKA-së. Në këtë njoftim, thuhet gjithashtu se procesi i auditimit ka identifikuar mangësi në përdorimin e të dy lloje të tenderimit sepse nuk është kryer planifikim i duhur para inicimit të procedurave.
“Nuk janë kryer analiza të duhura të nevojave, ekzaminime të mjaftueshme në terren dhe dokumentim adekuat. Vetëm një nga gjashtë kontratat e audituara kishte projekt kryesor, ndërsa matje gjeodezike paraprake nuk kishte në asnjërin rast.
Mangësi janë identifikuar edhe në hulumtimin e tregut dhe përcaktimin e vlerës së parashikuar të kontratave, ndërsa çmimet e ofertave ndryshonin në substancë nga vlera e parashikuar”- thuhet tutje në njoftim. Nga ky auditim i ZKA-së janë konstatuar edhe mangësi në procesin e vlerësimit të ofertave dhe në trajtimin e barabartë të operatorëve ekonomikë.
“Në dy raste janë shpërblyer operatorë ekonomik që nuk i kanë përmbushur plotësisht kërkesat e dosjes së tenderit. Sipas auditimit në tri raste do të mund të kurseheshin së paku 42 mijë euro.
Po ashtu në menaxhimin e kontratave nuk kishte monitorim aktiv dhe menaxhim të duhur të sigurisë së ekzekutimit, gjë që kishte rezultuar me ndryshime të sasive, vonesa dhe rreziqe në realizimin e kontratave”- thuhet në njoftimin e ZKA.
Lidhur me këtë auditim, Auditorja e Përgjithshme, Vlora Spanca, theksoi se kriteri “Tenderi ekonomikisht më i favorshëm” duhet të mbështetet në analiza reale të nevojave dhe kritere që marrin parasysh cilësinë dhe dobinë në afat më të gjatë. “Vetëm ndryshimi formal i kriterit të dhënies së kontratës nuk mund të sigurojë vlerën më të mirë për paranë publike”- tha ajo.
Raportin e plotë të auditimit të performancës “Efektiviteti në përdorimin e kriterit ‘tenderi ekonomikisht më i favorshëm’ për dhënie të kontratës në prokurim publik” e gjeni KËTU .