Pas fitoreve në ndeshjen e parë, Gjermania dhe Bregu i Fildishtë janë gati për të dhënë sinjale të tjera të forta për rivalët. Pancerat regjistruan fitoren e dhjetë radhazi pas triumfit të thellë 7-1 ndaj debutuesve të Curaçaos. Me këtë paraqitje bindëse, skuadra e Nagelsman tregoi se nuk duhet nënvlerësuar në vazhdim të turneut.
Kampionët e katërfishtë të botës ndodhen tashmë në një pozicion shumë të favorshëm, teksa synojnë të shmangin një tjetër eliminim të shpejtë nga faza e grupeve pas dy dështimeve të fundit. Mbrojtja mbetet një pikë për t’u përmirësuar. Gjermania nuk ka arritur të mbajë portën e paprekur në shtatë ndeshjet e fundit të Botërorit, seria më e dobët në këtë aspekt që prej vitit 1970.
Por forma e sulmit është një armë e madhe për skuadrën, pasi në gjashtë nga dhjetë fitoret e fundit ka shënuar të paktën tre gola. Përballë tyre do të jetë Bregu i Fildishtë, që gjithashtu e nisi aventurën me një fitore. Afrikanët mposhtën Ekuadorin 1-0 dhe siguruan suksesin e katërt radhazi në ndeshjet ndërkombëtare.
“Elefantët” kanë treguar se mund të përballen me kundërshtarë të fortë, pasi tre nga fitoret e tyre të fundit kanë ardhur ndaj ekipeve të renditura në 25 më të mirat e FIFA-s. Me formatin e zgjeruar të Botërorit, Bregu i Fildishtë beson se një kualifikim historik në fazën me eliminim direkt është një objektiv real.
Edhe një humbje ndaj Gjermanisë nuk do të ishte fundi për skuadrën afrikane, pasi ndeshjen e fundit të grupit do ta luajë ndaj Curaçaos, një prej ekipeve debutuese në këtë Kupë Bote. Në Kupën e Botës, Gjermania ka një bilanc pozitiv ndaj skuadrave afrikane me pesë fitore, dy barazime dhe vetëm një humbje.
Ndërkohë, Bregu i Fildishtë ka fituar vetëm një ndeshje në Botëror ndaj një kundërshtari europian, krahas dy humbjeve dhe një barazimi, për ta shndërruar përballjen e orës në një 90-minutësh ku objektivi është vendi i parë në grup.