Stadiumi i Houstonit do të presë një duel të zjarrtë europian mes Holandës dhe Suedisë, dy skuadra që synojnë të forcojnë pozitat e tyre në Grupin F të Kupës së Botës 2026 pas paraqitjeve të ndryshme në ndeshjen e parë. Holanda e drejtuar nga Ronald Koeman pati një nisje zhgënjyese, pasi barazoi 2-2 ndaj Japonisë, duke humbur avantazhin në minutat e fundit të takimit.
“Tulipanët” tani kërkojnë fitoren për të mos rrezikuar një pozicion jashtë dy vendeve të para përpara raundit të fundit të fazës së grupeve. Pavarësisht barazimit, Holanda hyn në këtë përballje me besim, teksa synon të zgjasë serinë e saj pozitive në Kupën e Botës.
Që prej humbjes në finalen e vitit 2010, pa llogaritur penalltitë, holandezët kanë regjistruar një ecuri prej 8 fitoresh dhe 5 barazimesh. Ky do të jetë gjithashtu testi i parë i tyre ndaj një kombëtareje europiane në Botëror që prej fitores së famshme 5-1 ndaj Spanjës në vitin 2014. Nga ana tjetër, Suedia e nisi aventurën në mënyrë perfekte.
Skandinavët mposhtën Tunizinë me rezultatin e thellë 5-1, një sukses që solli edhe pasoja për kundërshtarin, me shkarkimin e trajnerit të tyre. Pesë golat e shënuar në ndeshjen e parë ishin po aq sa Suedia kishte realizuar në të gjithë fazën e grupeve të Botërorit 2018.
Tashmë suedezët kërkojnë të përsërisin një start perfekt me dy fitore radhazi, diçka që nuk e kanë arritur që nga viti 1958, kur arritën deri në finalen e turneut. Megjithatë, përballjet ndaj skuadrave europiane në Kupën e Botës kanë qenë të vështira për skandinavët.
Në shtatë ndeshjet e fundit të fazës së grupeve ndaj ekipeve të UEFA-s, ata kanë marrë vetëm një fitore, 2 barazime dhe 4 humbje, edhe pse ajo fitore erdhi pikërisht në tokën amerikane, në Botërorin 1994. Dy përballjet e mëparshme mes Holandës dhe Suedisë në Botëror apo Europian kanë prodhuar gjithsej 77 goditje drejt portës, por asnjë gol.
Një nga ato sfida ishte edhe përballja e Botërorit 1974, ku u bë e famshme lëvizja teknike e Johan Cruyff, e njohur si “Cruyff turn”.